UKZ ka mirëpritur studentët me rastin e fillimit të Vitit Akademik 2025/2026
Universiteti Publik “Kadri Zeka” në Gjilan organizoi pritjen solemne për studentët e vitit të parë me rastin e fillimit të Vitit Akademik 2025/2026. Në këtë ngjarje të veçantë morën pjesë Rektori i Universitetit, Prorektorët, Dekanët, Sekretari i Përgjithshëm, personeli akademik dhe administrativ, Delegacioni i Universitetit PH Zug të cilët këto ditë po qëndrojnë në UKZ, si dhe studentët të cilët po fillojnë rrugëtimin e tyre në Universitet.
Rektori Prof. Asoc. Dr. Artan Dërmaku mbajti fjalën e mirëseardhjes për studentët e rinj, duke i uruar suksese dhe një vit të mbarë akademik. Ai theksoi se është një kënaqësi e veçantë dhe një emocion i madh që sot ju mirëpresim si gjeneratën më të re të Universitetit tonë. Me praninë tuaj, UKZ merr frymë të re, merr energji dhe motivim për të vazhduar misionin e tij – të edukojë, të frymëzojë dhe të përgatisë breza të rinj për sfidat e së ardhmes.
“Ju sot nuk po hyni vetëm në një universitet, por në një familje akademike ku vlerat e dijes, respektit dhe përparimit shoqëror janë themeli i çdo hapi. Universiteti “Kadri Zeka” është institucioni që prej themelimit ka ndërtuar rrugëtimin e tij mbi transparencë, përkushtim dhe partneritet, dhe sot me krenari mund të themi se është një nga universitetet më të besueshme dhe me perspektivë në vend,” tha Rektori në fjalimin e tij.
Në fjalimin e tij, Rektori Prof. Asoc. Dr. Artan Dërmaku inkurajoi studentët e rinj që të angazhohen seriozisht në studime dhe të shfrytëzojnë të gjitha mundësitë që ofron Universiteti Publik “Kadri Zeka”. Ai theksoi se “Një nga vlerat tona kryesore është se studenti është gjithmonë në qendër të vëmendjes. Profesorët dhe asistentët tanë u bëj thirrje sot që të punojnë me studentët me sinqeritet, me dashuri dhe me përkushtim, duke i konsideruar ata jo thjesht si nxënës, por si kolegë të ardhshëm, si bashkëpunëtorë që nesër do të mbajnë dhe pasurojnë shoqërinë tonë. Studentët e sotëm janë kuadrot e së nesërmes, ndaj marrëdhënia e ndërtuar mbi respekt dhe partneritet është themel i suksesit të përbashkët”, tha ndër tjerash Rektori Dërmaku.
Në kuadër të kësaj ceremonie, përveç fjalës së mirëseardhjes nga Rektori Prof. Asoc. Dr. Artan Dërmaku, fjalim mbajti edhe Prorektorja për Mësimdhënie dhe Çështje të Studentëve, Prof. Asoc. Dr. Shpresa Qamili. Ajo uroi studentët për hapin e tyre drejt edukimit të lartë dhe theksoi rëndësinë e përkushtimit dhe angazhimit në këtë fazë të re të jetës së tyre.
Edhe Prorektori për Bashkëpunim Ndërkombëtar dhe Projekte Prof. Dr. Dukagjin Leka, u dëshiroj mirëseardhje studentëve të rinj, derisa i njoftoi studentët për rëndësinë e përfshirjes së tyre në programe të ndryshme të mobilitetit ndërkombëtar, si dhe pjesëmarrjen në projekte shkencore dhe bashkëpunime që UKZ ofron në partneritet me universitete dhe institucione të tjera vendore dhe ndërkombëtare.
Pas përfundimit të pritjes solemne, drejtuesit e fakulteteve bashkë me stafin akademik dhe administrativ pritën studentët nëpër sallat mësimore. Ata u njoftuan me ambientet e mësimit dhe zhvilluan takime informuese rreth kurrikulave dhe përmbajtjes së programeve të tyre.
Drejtuesit e fakulteteve, së bashku me stafin e tyre, theksuan se universiteti është gjithmonë në dispozicion për të mbështetur studentët në sfidat akademike dhe personale që mund të hasin gjatë studimeve të tyre.
Universiteti Publik “Kadri Zeka” i uron të gjithë studentëve suksese të shumta në studime dhe zhvillim profesional gjatë këtij viti akademik. Njëherësh, UKZ uron edhe personelin akademik dhe administrativ për një vit të suksesshëm.
