UKZ dhe Universiteti i Graz-it drejt bashkëpunimit për projekte inovative
Rektori i Universitetit Publik “Kadri Zeka” në Gjilan, Prof. Asoc. Dr. Artan Dërmaku, ka pritur dje në takim Prof. Dr. Stefan Thalmann nga Universiteti i Graz-it në Austri, profesor i Analizës së Biznesit dhe Shkencës së të Dhënave dhe udhëheqës i Qendrës kërkimore BANDAS, si dhe z. Nehat Islami, Drejtor Ekzekutiv i Institutit UPCO.
Vizita e Prof. Thalmann, e mundësuar nga Instituti UPCO në kuadër të projektit SHER, kishte për qëllim avancimin e bashkëpunimit ndërinstitucional në fusha me rëndësi të veçantë si inteligjenca artificiale, digjitalizimi dhe ndërlidhja mes universiteteve dhe industrisë. Këto tema do të trajtohen më gjerësisht në punëtorinë që do të mbahet sot në Odën Ekonomike të Kosovës.
Gjatë këtij takimi, Rektori Dërmaku theksoi rëndësinë e bashkëpunimeve të tilla, duke thënë se për Universitetin Publik “Kadri Zeka”, është thelbësore që të ndërtojmë ura bashkëpunimi me institucione të njohura ndërkombëtare si Universiteti i Graz-it dhe Qendra BANDAS.
Inteligjenca artificiale dhe digjitalizimi janë fusha që po ndryshojnë mënyrën si jetojmë, mësojmë dhe punojmë, andaj ne dëshirojmë të jemi pjesë aktive e këtij transformimi. Falënderojmë Institutin UPCO për mbështetjen dhe jemi të hapur për projekte të përbashkëta që rrisin cilësinë e arsimit dhe fuqizojnë kërkimin shkencor në Kosovë, ka thënë ndër tjerash Rektori Dërmaku.
Në takim po ashtu u diskutuan edhe mundësitë konkrete për bashkëpunim ndërmjet UKZ-së dhe Qendrës BANDAS, me theks në projekte të përbashkëta kërkimore, shkëmbim akademik dhe nisma inovative.
