U ngjit në telat elektrikë të trenit, lëndohet rëndë kosovari 14-vjeçar në Gjermani
Një 14-vjeçar nga Kosova të enjten në mbrëmje ka pësuar lëndime të rënda pasi ishte ngjitur në një autocisternë që po qëndronte në stacionin e trenit në Wolfratshausen (Bavari) së bashku me dy shokë 16-vjeçarë.
14-vjeçari kishte ngritur pjesën e sipërme të trupit dhe ishte kapur në telin e sipërm, duke bërë kështu që të pësojë një goditje të fuqishme elektrike dhe të bjerë në tokë.
Pasi i është dhënë ndihma fillestare, ai është dërguar me helikopter shpëtimi në një klinikë speciale në Mynih, ndërsa mjekët e urgjencës zbuluan se 80 për qind e sipërfaqes së trupit të tij është djegur, por që gjendet jashtë rrezikut për jetën, shkruan bild.de, transmeton albinfo.ch.
Një dëshmitar e ka parë incidentin dhe ka lajmëruar shërbimet e urgjencës dhe policia arriti shpejt në vendngjarje, ndërsa reparti i zjarrfikësve vullnetarë të Wolfratshausen-it e e ka ndërprerë linjën elektrike, në mënyrë që të mos përbënte më rrezik.
Edhe 16-vjeçari ka pësuar lëndime të rënda, por jashtë rrezikut për jetën.
Paralajmërim nga Policia Federale
Policia Federale ka paralajmëruar urgjentisht për rreziqet në zonën e binarëve të trenit.
“Nga teli me energji prej 15,000 voltësh mund të krijohet një hapësirë elektrizuese e rrezikshme për jetën, edhe pa kontakt të drejtpërdrejtë”, paralajmëron zëdhënësja e Policisë, Federale Sina Dietsch.
“Objektet hekurudhore nuk janë të përshtatshme për qëndrimin tuaj – pavarësisht nga arsyeja. Ka rrezik për jetën si në binarë, ashtu edhe në vagona! Në funksion të pushimeve të ardhshme verore, veçanërisht prindërve u kërkohet të informojnë fëmijët e tyre për rreziqet”, ka deklaruar ajo.
