U mbajt tryeza mbi rëndësinë e orientimit në karrierë për të rinjtë
Në Gjilan u zhvillua një tryezë diskutimi me temën “Rëndësia e orientimit në karrierë për të rinjtë e Gjilanit”, ku morën pjesë Studentë të UKZ-së, përfaqësues të institucioneve lokale, bizneseve dhe palëve tjera të interesit.
Ngjarja u organizua nga Qendra për Arsim e Kosovës (KEC) në kuadër të projektit “Fuqizimi dhe aftësimi i të rinjve përmes mundësive të reja – YEEP 2”, në bashkëpunim me Qendrën për Karrierë të Universitetit Publik “Kadri Zeka” në Gjilan.
Tryeza shërbeu si platformë për dialog të hapur dhe bashkëpunues mes të rinjve dhe aktorëve të ndryshëm lokalë. Gjatë diskutimit u theksua rëndësia e orientimit profesional për të rinjtë, sfidat dhe mundësitë reale të punësimit në komunën e Gjilanit, si dhe nevoja për krijimin e mekanizmave mbështetës që lidhin të rinjtë me tregun e punës.
Pjesëmarrësit vlerësuan rolin e projektit YEEP 2 dhe të Qendrës për Karrierë të Universitetit Publik “Kadri Zeka” në fuqizimin e të rinjve dhe në krijimin e urave ndërmjet arsimit dhe sektorit privat. Në takim u prezantuan edhe rezultatet e deritanishme të projektit YEEP 2, i cili synon rritjen e aftësive profesionale të të rinjve dhe lehtësimin e integrimit të tyre në tregun e punës.
Tryeza u cilësua si një hap i rëndësishëm drejt bashkëpunimit më të gjerë ndërmjet institucioneve arsimore, bizneseve dhe komunitetit lokal, me qëllim të mbështetjes së të rinjve në ndërtimin e një karriere të qëndrueshme.
