U mbajt takim mes UKZ-së dhe projektit SHER për rishikimin e kornizës së brendshme ligjore
Sot u zhvillua një takim koordinues mes Universitetit Publik “Kadri Zeka” në Gjilan dhe përfaqësuesve të projektit Sustainable Higher Education & Research (SHER), i financuar nga Qeveria e Austrisë. Ky takim është pjesë e bashkëpunimit të ngushtë mes UKZ-së dhe programit SHER, në bazë të Memorandumit të Mirëkuptimit (MoU) të nënshkruar gjatë këtij viti.
Në takim morën pjesë Rektori i Universitetit, Prof. Asoc. Dr. Artan Dërmaku, së bashku me menaxhmentin e universitetit, përfshirë Prorektorët dhe Dekanët e fakulteteve. Nga ekipi i SHER-it ishin të pranishëm z. Aqim Emurli, Team Leader, z. Nehat Dervishi, Koordinator Tematik, si dhe eksperti i programit SHER Lulzim Aliaj.
Gjatë takimit u diskutua mbi mbështetjen që SHER do të ofrojë për rishikimin dhe avancimin e kornizës së brendshme ligjore të UKZ-së, me qëllim forcimin e kapaciteteve institucionale dhe përmirësimin e standardeve të arsimit të lartë në universitet.
Në fjalën e tij, Rektori Prof. Asoc. Dr. Artan Dërmaku theksoi se ky bashkëpunim me SHER është një mundësi e jashtëzakonshme për të avancuar kornizën ligjore të universitetit dhe për të siguruar që UKZ të vazhdojë të zhvillohet në përputhje me standardet ndërkombëtare të arsimit të lartë.
Ndërsa z. Aqim Emurli, Team Leader i SHER, tha se jemi të përkushtuar të ofrojmë ekspertizën tonë për të mbështetur UKZ-në në rishikimin e kornizës ligjore dhe në avancimin e praktikave institucionale.
Në periudhën e ardhshme priten takime, punëtori dhe organizime të ndryshme deri në përfundimin e rishikimit dhe avancimit të kësaj kornize, me qëllim përmirësimin e vazhdueshëm të strukturave ligjore dhe menaxheriale të universitetit.
