U mbajt mbledhja e gjashtë e rregullt e Kuvendit Komunal të Vitisë
Nën udhëheqjen e kryesuesit të Kuvendit Komunal të Vitisë, Bekim Azizi, është mbajtur sot mbledhja e gjashtë e rregullt e Kuvendit Komunal.
Në hapje të kësaj mbledhjeje, kryesuesi Azizi i njoftoi anëtarët lidhur me vlerësimin e ligjshmërisë së akteve që kanë kaluar përmes Komitetit për Politikë dhe Financa (KPF) dhe më pas janë miratuar në Kuvendin Komunal të Vitisë.
Para shqyrtimit të pikave të rendit të ditës, asamblistët ngritën çështje dhe parashtruan pyetje të ndryshme, për të cilat në emër të ekzekutivit dha përgjigje zëvendëskryetari i komunës së Vitisë, Hasan Aliu. Në fokus ishin dëmet e shkaktuara nga breshëri në disa fshatra të komunës së Vitisë dy ditë më parë, me që rast është formuar edhe komisioni komunal ppr evidentimin e dëmeve të shkaktuara. Lidhur me këtë, kryesuesi i Kuvendit Bekim Azizi, u bëri thirrje qytetarëve që janë të prekur dhe u janë shkaktuar dëme, që të lajmërohen tek komisionin adekuat. U parashtruan edhe një varg pyetjesh të tjera në fusha të ndryshme. Gjithashtu, u mbajt një minutë heshtje për tre të rinjët nga komuna e Vitisë, që humbën jetën tragjikisht gjatë muajit qershor.
Gjatë kësaj mbledhjeje, pas diskutimeve, me shumicë votash janë miratuar këto pika të rendit të ditës:
Propozim-vendimi për Kornizën Afatmesme Buxhetore (KAB) të Komunës së Vitisë për periudhën 2026-2028, me ç’rast kryesuesi Azizi njoftoi këshilltarët se, ndonëse ishte paralajmëruar mbajtja e diskutimit publik me qytetarë lidhur me këtë dokument, i njëjti nuk u mbajt për shkak të mungesës së pjesëmarrjes së qytetarëve. Draftin e këtij propozim vendimi e prezantoi zyrtari për buxhet Berat Zuka, që njoftoi se buxheti për vitin 2026 do të jetë 18.324.211 euro. Në këtë mbledhje u miratuan edhe propozim-vendimi për themelimin e grupit punues për hartimin e Planit Vjetor të Punës së Kuvendit të Komunës së Vitisë për vitin 2026;
Propozim-vendimi për shfuqizimin e vendimit për miratimin e Planit Ndërkomunal për Menaxhimin e Integruar të Mbeturinave për komunat: Gjilan, Kamenicë, Viti, Novobërdë, Partesh, Kllokot, Ranillug, Ferizaj, Kaçanik, Shtime, Hani i Elezit dhe Shtërpcë, vendim ky me numër 01-110/05-402, datë 30.04.2025.
Mbledhja u karakterizua me diskutime konstruktive dhe angazhim të anëtarëve të Kuvendit Komunal për çështjet me rëndësi për komunën e Vitisë.
