U mbajt ceremonia e hapjes së Klinikës Ligjore mbi Azilin, Refugjatët dhe Pashtetësinë
18 Mars, 2025 – Në Fakultetin Juridik të Universitetit Publik “Kadri Zeka” në Gjilan u mbajt ceremonia e hapjes së Klinikës Ligjore mbi Azilin, Refugjatët dhe Pashtetësinë, një iniciativë e financuar nga Bashkimi Evropian dhe e mbështetur nga UNHCR dhe Programi për të Drejtat Civile Kosovë (CRPK).
Ceremoninë e hapi Porf. Dr. Dukagjin Leka, Prorektor për Bashkëpunim Ndërkombëtar dhe Projekte në Universitetin Publik “Kadri Zeka”. Prorektori Leka në emër të Rektorit Prof. Asoc. Dr. Artan Dëramku, përshëndeti pjesëmarrësit të cilëve njëherësh ju dëshiroi suksese. Në fjalën e tij Prorektori Por. Dr. Dukagjin Leka theksoi rëndësinë e Klinikës Ligjore si një mundësi e mirë për studentët që të përfshihen në çështje të së drejtës ndërkombëtare dhe për ata që kontribuojnë në fuqizimin e sistemit të drejtësisë në Kosovë.
Ndërkohë, Znj. Merita Ahma, zyrtare për mbrojtje ligjore në UNHCR, foli mbi sfidat me të cilat përballen refugjatët dhe personat pa shtetësi, duke nënvizuar nevojën për përmirësimin e mekanizmave mbrojtës dhe zbatimin e politikave të bazuara në standardet ndërkombëtare.
Nga ana e tij, Mr. Memli Ymeri, Drejtor Ekzekutiv i CRPK, vuri theksin tek rëndësia e bashkëpunimit mes institucioneve akademike, organizatave ndërkombëtare dhe sektorit të drejtësisë për të siguruar një qasje efektive dhe të drejtë për të gjithë ata që kërkojnë mbrojtje ligjore në Kosovë.
Pas fjalimeve, studentët patën mundësinë të marrin pjesë në një diskutim të hapur, ku u trajtuan çështje praktike mbi azilin dhe pashtetësinë. Në fund të aktivitetit, u shpërndanë materiale informuese për të ndihmuar studentët në edukimin e tyre ligjor mbi këtë fushë.
Klinika Ligjore do të zhvillohet nga 18 mars – 29 prill 2025 dhe do të përfshijë leksione, simulime praktike dhe vizita studimore.
Ligjëratat do të trajtojnë tema si: Korniza ligjore ndërkombëtare për mbrojtjen e refugjatëve dhe të drejtat e njeriut të cilën do ta mbaj Prof. Dr. Dukagjin Leka, për drejtësinë tranzicionale do të flas znj. Teuta Prekazi Haxhibeqiri, Zyra e Komisionerit të Lartë për të Drejtat e Njeriut pranë OKB-së, për instrumentet ndërkombëtare dhe legjislacionin e BE-së në fushën e azilit do të flas Prof. Asoc. Dr. Fatmire Krasniqi, z. Memli Ymeri do të flasë për temën korniza ligjore dhe institucionale në Kosovë, për instrumentet ndërkombëtare në fushën e pashtetësisë do të flas Prof. Asoc. Dr. Selim Daku, z. Mentor Seferi do të flas për Kornizën ligjore dhe institucionale në Kosovë.
Gjatë Klinikës Ligjore do të organizohen simulime praktike mbi procedurat për përcaktimin e statusit të pashtetësisë, regjistrimin e mëvonshëm të lindjes, konfliktin administrativ dhe rolin e gjyqësorit. Simulimet do të mbahen nga znj. Teuta Pireva, CRP/K, z. Yll Zajmi, CRP/K si dhe znj. Delushe Halimi-Judge.
Njëherësh gjatë Klinikës është paraparë të organizohen vizita studimore në Qendrën e Azilit në Magure nga z. Fitim Zariqi Udhëheqës i Qendrës së Azilit, ku studentët do të njihen me procesin e pranimit dhe trajtimit të azilkërkuesve.
Ndërsa në fund të klinikës do të mbahet testimi dhe certifikimi i studentëve pjesëmarrës të cilët do të vlerësohen përmes një testi arritshmërie.
Kjo klinikë ligjore është një hap i rëndësishëm drejt përgatitjes së juristëve të rinj për të mbrojtur të drejtat e refugjatëve dhe personave pa shtetësi në Kosovë dhe më gjerë.
