Turizmi malor në Istog, vendi që duhet vizituar çdo sezonë.
Bjeshkët e Istogut – Mokna “ Bukuroshja e Ballkanit “
Istogu ( rajoni i Podgurit ) mund të krenohet edhe me turizmin malor, i cili ka filluar të preferohet edhe nga të huajt. Zona e Podgurit konsiderohet për mjaft turistë një nga pjesët më të bukura malore në të gjithë Kosovën .
I mbrojtur nga muret e maleve madhështore, i shtruar me livadhe, pyjet e ahut dhe pishat e larta, burime të ftohta uji, zona malore turistike e Podgurit e shëndërron qytetin e Istogut në një vend potencialisht të fuqishëm për turizmin malor në të gjitha stinët.
Madhështia e natyrës së paprekur që të ofron kjo zonë nis me praninë e pyjeve të dendura, ku përveç pemëve të larta mbizotëron dukshëm edhe bimësia e ulët me lule shumëngjyrëshe e të rralla në llojin e vet.
Bjeshkët e Moknës “ Bukuroshja e Ballkanit “, gjenden në vargmalet e Alpeve Shqiptare (Bjeshkët e Nemuna ) në Veri-Perëndim të Kosovës.
Syri kap gjithë Kosovën që nga lindja e deri në perëndim ku ofrojnë një pamje magjepsëse të Podgurit dhe Rrafshit të Dukagjinit, Bjeshkët e Shalës së Bajgorës, Maja e Lubotenit, Vargmalet e Sharrit, Pashtriku, Gjeravica, Guri i Kuq, Bjeshkët e Lumbardhit, Maja e Hekurave, Mariashi, Hajla, Rusolija, Zhlëpi e deri tek Bjeshkët e Podgurit .
Vendi i vetëm nga ku mund t’i shijosh pamjen e tërë bjeshkëve të Kosovës, që fshehin në brendësinë e tyre ballafaqime të panumërta me alpinistë, botanistë, gjeografë dhe shumë dashamirës të alpeve, te të cilët kjo zonë sigurisht lë mbresa të pakrahasueshme.
Resurset natyrore të kësaj zone janë të lidhura së bashku edhe me trashëgiminë kulturore dhe historike të banorëve vendas, duke formuar kështu bazat më të rëndësishme për zhvillimin e turizmit. Aktivitete turistike malore te panumërta të cilat i ofron rajoni jonë do i shpalosim më poshtë
Via Ferrata – Shpellat Binjake
Shpella më tërheqëse Via Ferrata , shpella më e famshme Binjake në Ballkan, me dy korridore me gjatësi hyrje – dalje 70 m, është vendosur në malet e Istogut -Bajshe, 14 km nga qyteti i Istogut. Duhen 30 minuta deri në 1 orë për ta vizituar brenda.
Shpellat ofrojnë një përjetim, adrenalinë dhe freskinë e shpellave në ditë vape ku në fundin e shpellave qëndron bora dhe akulli i cili nuk shkrihet gjatë gjithë vitit.
View Point PODGURI
Një imazh më të madh se jeta, një aventurë një herë në jetë dhe një nga ndjenjat më të veçanta të jetës suaj- një thënie përshkruese e ndjenjës së shikuari nga një pikë vrojtimi (View point) e njerëzve në planetin Tokë.
Nga kjo fillon koncepti i realizimit të View Point – Podguri në qytetin e Istogut me konkretisht tek Burimi i Istogut.
Shtegu i cili do ju dërgojë tek pika vrojtuese ka gjatësi 986 m dhe lartësi mbi detare 758.49m Përmes kësaj pike vrojtuese do keni një pamje mahnitëse të gjithë Podgurit.
Paragliding
Pika e vetme e Paraglidingut në Kosovë e ndërtuar deri me tani është në Shymek , bjeshkë kjo e cila është në vargmalin e bjeshkës së Moknës 18 km nga qyteti i Istogut ku mund të gjeni lumturinë e një fluturimi në kaltërsinë e qiellit të hapur dhe të përballeni me flladin e maleve.
Shtigjet malore me biçikleta -Të gjitha aktivitetet dhe aventurat me biçikleta malore mund t’i përjetoni brenda 3 ditëve në malet magjepse Mokna “Bukuroshja e Ballkanit”. Përjetoni një ngjitje që të lë pa frymë, pamje të përsosur dhe aventura në pastërtinë e saj, flladi dhe uji i ftohtë i bjeshkëve, vendpushime, ushqim dhe mikpritje tradicional në shtëpizat e bjeshkatarëve .
Mënyra më e mirë për të përjetuar madhështinë e shtigjeve malore !
Shtigjet e ecjeve , vrapimi dhe kampet malore- “Nëse thjesht doni të përjetoni botën e maleve duke ecur, vrapuar apo në kampe, bjeshkët tona ju ofrojnë këtë mundësi ku të gjitha shtigjet janë të markuara, shënjuara dhe digjitalizuara sipas standardeve ndërkombëtare të bjeshkatarisë.
Via Dinarika ( Sejnovë – Mokna 41 km )
Livadhet e Istogut – Via Ferrata Shpellat Binjake 8.5 km
Gurrat e Bardha – Kodra e Dynes 8.3 km
Maja e Korenikut & Lkeni i Shoshanit 12.5 km
Shtegu Ibrahim Rugova– Gurrat e Bardha 10.8 km
Maja e Madhe – Mokna 12.5 km- Atraksionin e këtyre aktiviteteve e shton edhe aplikimi i tyre ne sezonin e dimrit ku ecja më këpucë bore është një përjetim i paharruar.
Një vizitë në burimin e ujit në Istog , aty ku uji ndërthuret me bjeshkët
Uji i pastër i burimit të Istogut, ambienti i bukur turistik ku natyra dhe qetësia e bëjnë këtë zonë mjaft tërheqëse për pushime.
Bjeshka e Moknës është zona turistike më e vizituar në rrethin e Istogut . Kjo zonë me bukuri të rralla është e preferuar jo vetëm nga turistët vendas por edhe nga turistët e huaj të cilët e emërtuan si “Bukuroshja e Ballkanit “ dhe që parapëlqejnë të njihen edhe me zakonet apo traditat e rajonit të Podgurit.
Klubi Alpin Podguri pёrmes udhërrёfyesëve malor me përvojë do t’ju shpiejnё në një aventurë tё paharruar në Bjeshkët e Moknës – Bukuroshja e Ballkanit
