Trumpi e lexon në Kongres letrën që ia çoi Zelensky: Koha për t’i dhënë fund kësaj lufte
Presidenti amerikan, Donald Trump ka thënë se e vlerëson gatishmërinë e Volodymyr Zelenskyt për ta nënshkruar një marrëveshje për mineralet me Shtetet e Bashkuara dhe për të shkuar në tavolinën e negociatave për të sjellë më afër paqen e qëndrueshme në Ukrainë, raporton The Guardian.
“Më herët sot, mora një letër të rëndësishme nga presidenti Zelensky i Ukrainës”, tha presidenti amerikan në një fjalim para Kongresit, pas takimit të dështuar të javës së kaluar në Shtëpinë e Bardhë. Duke cituar nga letra, Trump tha se Zelensky i kishte shkruar: “Ukraina është e gatshme të vijë në tryezën e negociatave sa më shpejt të jetë e mundur për të sjellë paqen e qëndrueshme më afër. Askush nuk e dëshiron më shumë paqen sesa ukrainasit”.
“Ekipi im dhe unë jemi të gatshëm të punojmë nën udhëheqjen e fortë të presidentit Trump për ta arritur një paqe që zgjat”, citoi Trump nga letra e Zelenskyt. “Ne e vlerësojmë vërtet sa shumë ka bërë Amerika për ta ndihmuar Ukrainën ta ruajë sovranitetin dhe pavarësinë e saj”.
Trump gjithashtu tha se ka qenë në “diskutime serioze me Rusinë” dhe pretendoi se ka marrë “sinjale të forta se ata janë të gatshëm për paqe”.
“A nuk do të ishte e mrekullueshme?” tha ai. “Është koha për t’i dhënë fund kësaj çmendurie. Është koha për t’i ndaluar vrasjet. Është koha për t’i dhënë fund kësaj lufte pa kuptim. Nëse dëshiron t’i përfundosh luftërat, duhet të flasësh me të dyja palët”.
Këto komente shënuan një zbutje të lehtë të gjuhës së Trumpit ndaj Ukrainës pas përplasjes në Zyrën Ovale, pas së cilës ai urdhëroi pezullimin e të gjithë ndihmës ushtarake amerikane për Ukrainën.
Trump pritej që t’i paraqiste në fjalimin e tij para Kongresit planet e tij për Ukrainën dhe Rusinë, por nuk dha më shumë detaje.
