Trump për Putinin: Jam i zhgënjyer, por ende s’kam mbaruar me të
Donald Trump ka thënë se është i zhgënjyer, por ende se ka mbyllur me Vladimir Putinin.
Presidenti amerikan u pyet nga BBC nëse i beson udhëheqësit rus dhe u përgjigj: “Nuk i besoj pothuajse askujt.”
Trump foli vetëm pak orë pasi njoftoi planet për të dërguar armë në Ukrainë dhe paralajmëroi për tarifa të ashpra ndaj Rusisë nëse nuk arrihet një marrëveshje armëpushimi brenda 50 ditëve.
Në një intervistë nga Zyra Ovale, presidenti gjithashtu dha mbështetjen e tij për NATO-n, edhe pse dikur e kishte cilësuar si të vjetëruar, dhe ritheksoi mbështetjen e tij për parimin e mbrojtjes së përbashkët të aleancës.
I pyetur nëse mbijetesa nga atentati e kishte ndryshuar, Trump tha se përpiqet të mendojë sa më pak për këtë gjë.
“Nuk më pëlqen të mendoj nëse më ka ndryshuar,” tha Trump. Të merresh me këtë, shtoi ai, “mund të jetë ndryshim jete.”
Trump tha se kishte menduar se një marrëveshje me Rusinë ishte në horizont.
Kur u pyet nëse e kishte mbyllur me Putinin, presidenti u përgjigj: “Jam i zhgënjyer prej tij, por nuk kam mbaruar me të. Por jam i zhgënjyer prej tij.”
“Do të kemi një bisedë të shkëlqyer. Do të them: ‘Kjo është mirë, mendoj se jemi afër marrëveshjes,’ dhe pastaj ai shemb një ndërtesë në Kiev.”
Rusia ka shtuar sulmet me dronë dhe raketa ndaj qyteteve ukrainase javët e fundit, duke shkaktuar viktima rekord në mesin e civilëve.
