Trump i dërgon letër Osmanit: Mike e vërtetë e Shteteve të Bashkuara, vendet tona ndajnë lidhje të thellë
Presidentja Vjosa Osmani ka pranuar sot një letër nga Presidenti i ShBA’së, Donald Trump.
Sipas Presidencës, në letrën e Trump shkruan se vendimi për të pranuar shtetas nga shtete të tjera tregon gatishmërinë e fortë të Kosovës për të bashkëpunuar me Shtetet e Bashkuara të Amerikës, duke shtuar se lidershipi në këtë çështje tregon fuqinë dhe dhembshurinë e popullit të Kosovës.
“Shtetet e Bashkuara të Amerikës dhe Kosova ndajnë një lidhje të thellë, të bazuar në respektin e ndërsjellë, vlera të përbashkëta demokratike dhe një vizion për një të ardhme paqësore dhe prosperuese. Përkushtimi juaj për forcimin e kësaj lidhjeje nuk ka kaluar pa u vërejtur, dhe jam i bindur se së bashku do të vazhdojmë të avancojmë qëllimet tona të përbashkëta,” ka theksuar Presidenti Trump në letrën e tij.
Trump e ka quajtur Osmanin mike të vërtetë të ShBA’së, teksa ka thënë se mezi pret të punojë bashkë me të në vitet në vijim.
“Ju falënderoj sërish për lidershipin tuaj të guximshëm dhe për faktin që qëndroni si një mike e vërtetë e Shteteve të Bashkuara. Mezi pres të punojmë së bashku me ju në vitet që vijnë.”
Në fund të letrës, Trump i ka dërhuar Presidentes Osmani edhe urimet nga Zonja e Parë e SHBA-ve, Melania Trump.
