Trajneri boshnjak që dërgoi Marokun në Botëror nuk do ta përcjellë gjysmëfinalen
Vahid Halilhoxhiq është trajneri nga Bosnjë-Hercegovina që ka dërguar Marokun në Kupën e Botës në Katar. Por ai po i shmang ndeshjet e Botërorit që ka hyrë në fazën finale.
Trajneri i njohur si Vaha, ka ndërtuar për tri vjet ekipin e Marokut, që tashmë është në gjysmëfinale. Sipas “avaz.ba”, do të ishte e logjikshme që Vaha të ishte në stol të Marokut në Katar. Por ai u largua dhe në postin e selektorit erdhi Ëalid Regragui që tashmë po vlerësohet lartë.
Por natyrisht ndikimi i Vahës te Maroku është i madh.
Ai nuk është pajtuar me dy yje të Marokut dhe për këtë u shkarkua.
Halilhoxhiq ka treguar se nuk do ta shikojë gjysmëfinalen.
“Më mirë të mos flas asgjë. Sikur të mos isha aty për tri vjet, sikur nuk kam punuar me ta, sikur nuk e kam arritur asnjë fitore me ta. E tëra po më neverit. Më nuk kam dëshirë të flas për futbollin. Askush nuk dëshiron të thotë. Është sport, nuk mund njeriu për dhjetë ditë të bëjë atë që bëhet për tri vjet”, ka thënë Halilhoxhiq për “Avaz”.
Ai beson se do të ishte i suksesshëm në Botëror. Maroku edhe pa të po shfaq nivel të jashtëzakonshëm, të pabesueshëm.
“Rezultati në futboll arrihet me punë. Unë kam punuar tri vjet. Kam ndjerë se mund ta bëjë këtë. Që ekipi është gati, që të gjithë janë të uritur për këtë. Tani njerëzit më thërrasin nga Amerika, Kanadaja, Egjipti, Japonia, Afrika. Nuk e di çka të them”, ka thënë Halilhoxhiq, që në gusht u zëvendësua nga Regragui, pas telasheve të gjata me lojtarët dhe me federatën.
“Ishte misioni im i fundit”, vazhdon Halilhoxhiq. “Misioni që në mënyrë maestrale ta përmbylli çdo gjë. Por krejt shkoi mbrapsht. Për kështu është, kësi tipi jam unë dhe kjo nuk është hera e parë”, thotë trajneri boshnjak.
Ai për herë të tretë shkarkohet pasi e dërgon një përfaqësuese në Botëror. Por vet nuk ka qenë ende në skenën më të madhe. Kjo i ndodhi para Botërorit 2010 me Bregun e Fildishtë e po ashtu katër vjet më parë me Japoninë.
