Tërhiqet 25% e Policisë nga objektet komunale në veri
Policia e Kosovës ka reduktuar numrin e pjesëtarëve të saj në dhe rreth objekteve komunale në veri.
Këtë e ka konfirmuar zëvendëskomandanti i Policisë për rajonin e veriut, Veton Elshani.
“Pas pranimit të vendimit të Qeverisë nga ana e menaxhmentit të Policisë, i njëjti është dërguar në terren për ekzekutim. Vendimi i Qeverisë së Kosovës ka filluar të implementohet dje dhe ka përfunduar sot”, ka thënë Elshani.
Reduktimi ka nisur të mërkurën në mbrëmje, bazuar në zotimin e Qeverisë së Kosovës dhënë Bashkimit Evropian.
Në një nga pikat e zotimeve, Qeveria ka bërë të ditur se do të tërheqë një pjesë të policisë, me qëllim të shtensionimit të situatës në veri.
Kryeministri Kurti ka thënë dje se dakordimi i Bratisllavës “do të ndikojë shumë në përforcimin e fokusit dhe të vendosjes së barazisë midis palëve që ndihmon në zbatimin e marrëveshjes”.
