Teatri i Qytetit të Gjilanit nderon me mirënjohje aktorët e gjeneratës së “vjetër”!
Në njoftimin publik të Teatrit të Qytetit të Gjilanit përmes faqes zyrtare, bëhet e ditur se ky institucion ka nderuar me respekt të veçantë aktorët e gjeneratës së vjetër, të cilët i përkasin pleiadës së aktorëve që kanë bartur mbi supe “barrën” e skenës teatrale në Gjilan e gjetiu, veçmas në gjysmën e dytë të shek. XX-të dhe fillimin e shek. XXI-të.
“Sot, në një ceremoni të thjeshtë e plot ndjenjë, nderuam aktorët e gjeneratës së vjetër – ata që me përkushtim, sakrificë dhe dashuri e ndërtuan teatrin tonë”, shkruan faqja zyrtare.
“Një moment falënderimi dhe respekti për njerëzit që i dhanë zë, shpirt dhe dinjitet skenës, dhe që me punën e tyre vazhdojnë të jenë themel i kujtesës sonë kulturore. Mirënjohje për kontributin, energjinë dhe trashëgiminë që na lanë dhe na e lënë çdo ditë”, vijon më tej njoftimi.
“Faleminderit që na mësuat çfarë do të thotë të jetosh për teatrin. Faleminderit, Sabedin, Jashar, Ramadan, Naser dhe Mejreme!”, përfundon njoftimi zyrtar nga drejtuesit e Teatrit të Gjilanit.
