Të mërkurën në Teatrin e Gjilanit premiera e shfaqjes për fëmijë “Petrushi i huaj” nga Meli Qena
Teatri Magjik i Fëmijëve rikthehet në skenën e Teatrit të Qytetit të Gjilanirt me shfaqjen-premierë “Petrushi i huaj”, shkruar nga S. J. Marshak, njëri nga autorët e shquar të letërsisë botërore për fëmijë, si dhe me regji të doajenes së skenës, regjisores Meli Qena.
Subjekti i shfaqjes përshkruan djaloshin çapkën i cili me çdo kusht do që t’i shmanget shkuarjes në shkollë, por që në fund sheh se cila rrugë është më e vështirë dhe më e padobishme sesa mësimi, ndaj vendos t’i rikthehet bangave të shkollës.
“Petrushi i huaj”, është një tekst e shfaqje me plotë imagjinatë e humor, lojë e mençuri, dritë e muzikë, me situata të shumëta e të papritura, me ngjyrë e poezi, të ndërthurura strukturalisht me mjeshtëri nga regjisorja Meli Qena në bashkëpunim me aktorët profesionistë të Teatrit të Qytetit të Gjilanit.
Aktorja e regjisorja doajene, Meli Qena ka lindur në vitin 1949 në qytetin e Mitrovicës, ndërsa ka studiuar për aktrim në Universitetin e Beogradit. Deri në vitin 1990 ka punuar në TVP (Televizioni i Prishtinës) dhe krahas kësaj ka realizuar një sërë rolesh në teatër dhe film.
Aktorja e regjisorja Qena ka punuar edhe në teatrin “Dodona” të Prishtinës, ku shquhet për regjinë e një numri të madh të realizimit të shfaqjeve për fëmijë.
Në vitin 2015 ajo u nderua me shpërblimin për veprimtari jetësore e kulturore nga Ministria e Kulturës, Rinisë dhe Sportit.
