Superliga vazhdon me ndeshjet e xhiros së 11-të, luhet në Podujevë, Skenderaj e Ferizaj
Albi Mall Superliga e Kosovës vazhdon me ndeshjet e xhiros së 11-të, ku tri janë në program për t’u zhvilluar sot.
Vëmendja e adhuruesve të futbollit kosovar padyshim që do të jetë në Podujevë, ku takohen dy rivalët rajonal Llapi dhe Prishtina.
Llapjanët janë këndellur pas një starti të dobët dhe synojnë ta mposhtin Prishtinën, ndërkohë kryeqytetasit pas gjashtë fitore radhazi kërkojnë të vazhdojnë këtë seri.
Në seri të fitoreve është futur edhe kampioni në fuqi i Kosovës, Drita. Gjilanasit kanë marrë katër fitore radhazi dhe kërkojnë të pestën në Skënderaj ku përballen me Drenicën.
Ndërkohë vendasit kanë pësuar katër disfata të njëpasnjëshme dhe synojnë ta ndërpërejnë këtë seri negative.
Ndeshja tjetër e ditës së sotme do të zhvillohet në Ferizaj, ku Ferizaj takohet me skuadrën e fundit në tabelë, Prishtina e Re.
Të gjitha ndeshjet e ditës së sotme fillojnë nga ora 13:00.
