Studentët e Fakultetit Juridik të UKZ-së fillojnë praktikën në Gjykatën Themelore të Gjilanit
18 Mars, 2025 – Studentët e Fakultetit Juridik të Universitetit Publik “Kadri Zeka” kanë nisur praktikën e tyre tre-mujore në Gjykatën Themelore të Gjilanit.
Ky bashkëpunim i rëndësishëm është pjesë e zhvillimit të lëndëve praktike të moduleve administrativ, penal, civil dhe financiar, të cilat përbëjnë shtyllat kryesore të formimit akademik për studentët e drejtësisë.
Ky program praktik është realizuar në kuadër të Memorandumit të Bashkëpunimit të nënshkruar mes Universitetit Publik “Kadri Zeka” dhe Gjykatës Themelore të Gjilanit, duke synuar rritjen e përvojës profesionale të studentëve dhe përgatitjen e tyre për sfidat e tregut të punës.
Me rastin e fillimit të praktikës, studentët e Fakultetit Juridik, së bashku me profesorët Vaxhid Sadriu dhe Liridon Dalipi, u pritën në një takim nga kryetari i Gjykatës Themelore të Gjilanit, z. Vehnar Salihu.
Gjatë takimit, u diskutua rëndësia e praktikës profesionale dhe mundësitë që ky bashkëpunim ofron për studentët, duke i ndihmuar ata të njihen nga afër me procedurat gjyqësore dhe punën e sistemit të drejtësisë.
Kryetari i Gjykatës, z. Salihu, shprehu mbështetjen e tij për këtë iniciativë, duke theksuar se një përvojë e tillë është thelbësore për formimin profesional të juristëve të rinj. Nga ana tjetër, profesorët Vaxhid Sadriu dhe Liridon Dalipi falënderuan Gjykatën Themelore për gatishmërinë për të pritur studentët dhe për kontributin në përmirësimin e njohurive praktike të tyre.
Përmes kësaj praktike, studentët do të kenë mundësinë të angazhohen drejtpërdrejt në mjedisin gjyqësor, duke marrë pjesë në procese dhe aktivitete të ndryshme ligjore. Ky bashkëpunim është një hap i rëndësishëm drejt rritjes së cilësisë akademike dhe lidhjes më të ngushtë mes arsimit dhe praktikës profesionale.
