Sot, në Grykën e Karadakut – Mbahet edicioni i 13-të i manifestimit rajonal të Poezisë “Trekëndëshi poetik…”
Manifestimi rajonal i poezisë, “Trekëndëshi poetik i paqes”, i filluar tashmë nga viti 2011 e këndej, në përkushtim të 12 Qershorit – Ditës së Lirisë për Kosovën, mbahet sot, në Grykën e Karadakut, përkatësisht në hapësirat e bukura të restorant “Dunavit”.
Organizatorët e këtij edicioni, Ars Clubi “Beqir Musliu”, që është dhe ideator e themelues njëkohësisht, si dhe revista letrare “Juvenilja” nga Shkupi, kanë parapa temë bosht të këtij Manifestimi, “Fillet e letërsisë në Kosovën Lindore – Trekëndëshin Kufitar”, ku shkrimtarët e tri shteteve të kësaj pjese të Ballkanit, do të debatojnë.
Më pas, do të mbahet dhe “Koha e Poezisë”, e njohur si ora poetike e këtij Manifestimi, nga afro 30 krijues të përzgjedhur, poezitë e të cilëve, po edhe të të tjerëve nga ky trekëndësh kufitar, do të botohen në revistën letrare “Agmia” dhe atë të Shkupit, “Juvenilja”.
Sponzor i këtij edicioni është boksieri i peshave të rënda në boksin profesionist, Erzen Rrustemi .
