Sonte nis Botërori më i madh në histori: 48 kombëtare, 104 ndeshje dhe një muaj emocionesh
Nga stadiumi legjendar i Mexico City-t, sonte ngrihet sipari i Kupës së Botës 2026, turneut që pritet të thyejë çdo rekord shikueshmërie dhe spektakli – shkruan TV Gjilani.
Bota ndalet sonte për futbollin.
Pas katër vitesh pritjeje, Kupa e Botës 2026 hap zyrtarisht siparin në Amerikën e Veriut, duke shënuar fillimin e edicionit më të madh në historinë e këtij kompeticioni. Për herë të parë do të marrin pjesë 48 kombëtare, ndërsa gjatë 39 ditëve të ardhshme do të zhvillohen plot 104 ndeshje në Shtetet e Bashkuara të Amerikës, Meksikë dhe Kanada.
Ndeshja hapëse do të luhet në stadiumin historik të Mexico City-t, ku nikoqiri Meksika përballet me Afrikën e Jugut. Me këtë rast, stadiumi legjendar bëhet i pari në histori që pret tri ndeshje hapëse të Kupës së Botës, pas viteve 1970 dhe 1986.
Mediat ndërkombëtare e cilësojnë Botërorin 2026 si një pikë kthese për futbollin global. Formati i zgjeruar sjell më shumë kombëtare, më shumë tregje futbolli dhe më shumë mundësi për surpriza, ndërsa pritet që miliarda tifozë në të gjitha kontinentet të ndjekin garën për trofeun më të çmuar të futbollit.
Në mesin e favoritëve për titull përmenden kampionët aktualë të Argentina, Franca, Spanja, Brazili dhe Anglia, por historia ka dëshmuar vazhdimisht se Botërori është vendi ku lindin surprizat më të mëdha.
Nga sonte e deri më 19 korrik, futbolli do të jetë në qendër të vëmendjes së planetit. Ëndrrat e 48 kombëtareve nisin nga pika zero, por vetëm njëra do ta ngrejë trofeun e artë në fund të rrugëtimit.
