Shkruan: Mensur Mamuti, Tetovë: – Unë, gjëzat dhe Horizonti
Me enigmatikë merrem që nga fëmijëria. Mund të them që kam filluar të bëj fjalëkryqe para moshës 10 vjeçe. Më shumë prej të gjitha gjëzave më pëlqenin rebuset, kështu që tentoja t’i bëja edhe ato.
Shkruan: Mensur Mamuti
Si fillorist e pata dërguar një mini fjalëkryq dhe një rebus në “Eurekën” e atëhershme. Normalisht që nuk u botuan. Jo për diç tjetër por për shkak të cilësisë.
E merrja “Eurekën” rregullisht, deri sa më ra në dorë një numër i “Kvizit”. Nga ajo kohë, “Eurekën” dhe revistat tjera enigmatike të asaj kohe fillova t’i bleja kohë pas kohe, ndërsa “Kvizin” mezi e pritja të dalë. Sepse nuk kishte revista në gjuhën shqipe. Kur isha në shkollë të mesme, shumë shpesh mendoja për atë se si mund ta botoja unë një revistë si “Kvizi”, mirëpo matematika nuk më dilte assesi. E merrja një fletore dhe e përgatitja strukturën e revistës dhe të gjithë variantet rrotulloheshin rreth një reviste prej 20 faqesh. Por, siç thashë, matematika thoshte ndryshe.
Kur, në vitin 1981, dëgjova që në Kosovë ishte botuar një revistë enigmatike në gjuhën shqipe, të them të drejtën, isha skeptik. Mendoja që do të jetë një revistë vetëm me fjalëkryqe klasike dhe skandinave, ashtu siç ishim mësuar t’i shohim në gazetat e përditshme “Flaka e vëllazërimit”, “Rilindja” dhe në disa javore të asaj kohe. Por, kur më ra në dorë një ekzemplar i “Horizontit” dhe kur pashë shumëllojshmëri gjëzash, mu si e planifikoja unë, thashë “Oh, shyqyr. Qenka tamam një revistë enigmatike”.
Horizonti, si çdo gjë tjetër sot që duhet blerë dhe lexuar, kaloi nëpër faza të ndryshme dhe pati një pauzë të madhe.
Me disa nga anëtarët e Horizontit jam njoftuar që nga vitet 1999/2000, ndërsa me të tjerët pas vitit 2016, ndoshta edhe më herët.
Kur u ftova për 40-vjetorin e “Horizontit”, në vitin 2021, i dhashë vetes një detyrë, do të bëj çmos që të rikthehet “Horizonti”. Do t’u bëj apel anëtarëve të kësaj reviste që të vazhdojnë dhe të mos e lënë këtë revistë të parë enigmatike në gjuhën shqipe të shterret krejtësisht. Kjo u mirëprit nga të gjithë të pranishmit atë ditë, ndërsa disa enigmistë filluan t’i kthehen zanatit të tyre. Filluan të shtohen takimet, aktivitetet dhe në fund edhe botimet.
Me këtë rast, këtë fjalëkryq @revista.rebusi ia kushton 44-vjetorit të “Horizontit” duke i dëshiruar shumë suksese në vitin 2025!
Zgjidhni online: https://mensurblog.wordpress.com/…/fjalekryqi-klasik…
