Shkëmbim përvojash akademike e kulturore mes studentëve të UKZ-së dhe PH Zug gjatë vizitës studimore në Gjilan
Që nga viti 2017, Universiteti Publik “Kadri Zeka” në Gjilan dhe PH Zug nga Zvicra, kanë ndërtuar një partneritet të suksesshëm. Në kuadër të këtij partneriteti janë zhvilluar disa javë studimi, studentët e PH Zug kanë qëndruar në UKZ dhe studentët e UKZ-së kanë vizituar PH Zug.
Në vitin 2025, partneriteti u zgjerua me një projekt shkëmbimi për mësuesit, i mbështetur nga Movetia. Edhe këtë vit, Universiteti Publik “Kadri Zeka” në Gjilan mirëpriti një grup studentësh nga Shkolla e Lartë Pedagogjike ZUG e Zvicrës, në kuadër të vizitës studimore një javore.
Kjo vizitë u organizua me qëllim shkëmbimin e përvojave akademike, njohjen me sistemin arsimor të Kosovës dhe forcimin e bashkëpunimeve ndërkombëtare ndërmjet institucioneve arsimore.
Studentët e PH ZUG të shoqëruar nga studentët e UKZ-së, në familjet e të cilëve kanë banuar këto ditë, kanë zhvilluar takime me menaxhmentin e universitetit, ku u theksua rëndësinë e bashkëpunimeve ndërkombëtare për zhvillimin profesional të studentëve dhe përgatitjen e mësuesve me perspektiva të ndryshme kulturore dhe pedagogjike. Edhe studentët e UKZ-së thanë se vizita e studentëve zviceranë ofron një mundësi të çmuar për të mësuar nga praktikat më të mira të arsimit dhe për të ndarë përvoja të ndryshme me ta.
Stafi i Fakultetit të i udhëhequr nga Dekanati, Prof. Dr. Merxhan Avdyli, prezantuan programet studimore dhe sistemin arsimor në Kosovë. Dekani i Fakultetit të Shkencave Sociale, Prof. Asoc. Dr. Selim Daku moderoi një workshop mbi “Rolin e mësuesve në shkollë dhe shoqëri”, ku studentët u angazhuan në diskutime interaktive për sfidat dhe mundësitë e profesionit të mësuesit. Pjesë e rëndësishme ishte mësimdhënia e përbashkët në Fakultetin e Edukimit, e udhëhequr nga Prof. Asoc. Dr. Teuta Agaj, e cila prezantoi njohuritë e fituara gjatë vizitës studimore në Zug në vitin 2023, ku njohu konceptet e didaktikës së gjuhës angleze dhe tregoi shembuj të praktikës më të mirë nga mobiliteti në PH ZUG.
Edhe Sevdije Sadiku, e cila si mësuese ka marrë pjesë në projektin e shkëmbimit të mbështetur nga Movetia në maj 2025, ndau përvojat e saj mbi përfshirjen dhe praktikat e suksesshme në mësimdhënie. U.d. Udhëheqës i Divizionit Bashkëpunim Ndërkombëtar dhe Anëtarësime Betim Berisha prezantoi para studentëve bashkëpunimet ndërkombëtare, projektet dhe anëtarësimet që ka Universiteti Publik “Kadri Zeka” në arenën ndërkombëtare.
Po ashtu gjatë vizitës studimore pati diskutime për tema të zgjedhura nga vetë studentët , si për prezantime të praktikave më të mira nga shkollat e Gjilanit që kanë marrë pjesë në vizitën në ZUG, dhe bashkëpunimin shkollë-fakultet.
Studentët vizituan shkollën fillore “Thimi Mitko”, “Musa Zajmi”, “Selami Hallaçi” dhe “Rexhep Elmazi”, ku u ndanë në grupe për të ndjekur orët mësimore dhe për të parë nga afër punën e mësuesve dhe aktivitetet e nxënësve. Takimet me drejtuesit e shkollave dhe bashkëpunimi me mësuesit dhe nxënësit ofruan një përvojë të mirë për të gjithë pjesëmarrësit.
Studentët zviceran të shoqëruar nga ata gjilanas, kanë vizituar Monumentin e Prekazit, qytetin e Pejës dhe Prizrenin, duke u njohur më nga afër me historinë dhe kulturën e vendit.
Kjo vizitë kontribuon në përgatitjen e mësuesve të ardhshëm me përvoja ndërkulturore dhe praktika të shkëlqyera pedagogjike.
