Serbët në veri protestojnë kundër ndalimit të dinarit
Serbët lokalë në Mitrovicë të Veriut kanë nisur protestën të hënën, për të kundërshtuar vendimin e Bankës Qendrore të Kosovës (BQK) për ndalimin e përdorimit të dinarit.
Ka nisur protesta e thirrur këtë të hënë nga qytetarët serbë, të cilët janë kundër vendimit të fundit të Bankës Qendrore të Kosovës për ndalimin e përdorimit të dinarit si mjet pagese.
Deri më tani janë grumbulluar dhjetëra qytetarë në sheshin e Mitrovicës së Veriut, e në krye të tyre janë parë edhe zyrtarë të Listës Serbe.
“Situata e sigurisë është e qetë ne vazhdojmë me monitorimin e protestës. Ne fakt pro kanë filluar me u mbledh me herët janë diku deri 1 mijë persona. Nuk kemi asnjë problem që të theksohet. Protesta do të zgjasë 45 minuta”, ka deklaruar për Dukagjinin, zëvendësdrejtori i Policisë për rajonin e veriut, Veton Elshani.
BQK-ja e ka publikuar rregulloren e re më 17 janar dhe ajo ka hyrë në fuqi më 1 shkurt.
Banka Qendrore ka bërë të ditur se rregullorja e tyre nuk ndalon pranimin e mjeteve në llogaritë bankare në euro dhe nuk kufizon aktivitetin këmbimor të valutave nga institucionet financiare.
Të gjithë qytetarët që tashmë kanë një llogari bankare në euro, në cilëndo bankë të licencuar në Kosovë, mund ta përdorin të njëjtën për të pranuar mjetet nga çdo shtet.
Ndërsa, ata që ende nuk kanë llogari, mund të hapin një të tillë te secila bankë, sipas Rregullores së BQK-së për Qasje në Llogari Pagese për Shërbime Bazike, që për grupet e cenueshme e të skemave sociale nuk ka tarifë të hapjes e as të mirëmbajtjes, nga 1 janari 2024.
Kryeministri i Kosovës, Albin Kurti, ka deklaruar se qeveria e tij nuk do të ndërhyjë në vendimin e fundit të Bankës Qendrore të Kosovës (BKQ), të cilin e ka quajtur të pavarur në zbatimin e rregullores së saj.
Kryeministri Kurti ka mbështetur zbatimin e rregulloreve të reja për përdorimin e euros si monedhë të vetme, duke deklaruar se këtë vendim nuk mund ta kthejnë pas.
Ai, gjithashtu, ka theksuar se nuk ka plane për masë ndëshkuese dhe se do t’u jepet kohë serbëve etnikë për t’u përshtatur me këtë ndryshim.
Burimi i lajmit: Dukagjini
