Seancë e jashtëzakonshme plenare e Kuvendit
Nën udhëheqjen e kryetarit Dimal Basha, Kuvendi sot mbajti seancën e dytë të jashtëzakonshme plenare me kërkesë të 41 deputetëve, me vetëm një pikë të rendit të ditës, zgjedhja e Qeverisë së Republikës së Kosovës.
Në hapje të saj kryetari Basha tha se në mbështetje të nenit 85 të Kushtetutës së Kosovës, presidentja e Republikës së Kosovës Vjosa Osmani me dekretin 184/25 të datës 04.11.2025 ia ka propozuar Kuvendit të Kosovës kandidatin për kryeministër, Glauk Konjufca, për të formuar Qeverinë e Republikës së Kosovës. Andaj ai ftoi mandatarin Konjufca për ekspozenë para deputetëve dhe paraqitjen e emrave të kabinetit qeveritar.
Mandatari për formimin e Qeverisë, Glauk Konjufca në fjalën e tij para deputetëve tha se pa një Qeveri të re, Republika e Kosovës e ka të sigurtë vetëm një gjë: thellimin e krizës aktuale.
“Me këtë animozitet në spektrin tonë politik, vështirë që do arrijmë edhe një konsensus për zgjedhjen e presidentit në muajin mars”, tha Konjufca, duke shtuar se ky vit do njihet si vit që shumica humbi në përpjekje për formim të institucioneve.
“Për herë të parë Kuvendi i Republikës nuk arriti ta legjitimojë me votë Qeverinë e shtetit. Votimit të 26 tetorit i priu një krizë 6 mujore si rezultat i pamundësisë për ta zgjedhur kryetarin e Kuvendit. Viti 2025 do mbahet mend si vit që shumica e vitit humbi në përpjeketje për themelin të Kuvendit dhe Qeverisë”, tha Konjufca gjatë fjalës së tij si mandatar për formim të Qeverisë.
Gjatë fjalimit ai përmendi edhe disa nga të arriturat e Qeverisë së udhëhequr nga Albin Kurti.
“Po hyjmë në vitin e pestë me rritje ekonomike mbi 4 përqind, disiplina fiskale po shkon duke u konsoliduar dhe mbledhja e tatimeve ka shënuar rritje enorme. Në veri të vendit janë luftuar me sukses strukturat kriminale të Serbisë, kurse buxheti për mbrojtje është katërfishuar. Në planin ndërkombëtar, gjatë këtyre viteve u mundësua lëvizja pa viza në Zonën Shengen për qytetarët tanë dhe erdhën tre njohje të reja, këto janë bërë falë punës së mirë të qeverisë Kurti”, tha Konjufca.
Tani, sipas tij janë në fazën e dytë për krijimin e qeverisë.
“Synojmë disa gjëra bazike si kursimi i Kosovës nga dy palë zgjedhje eventuale që mund të jenë në dhjetor dhe në mars të vitit të ardhshëm”, tha ai.
Konjufca potencoi se kanë bërë tri veprime për të shmangur zgjedhjet.
“Dy letra për koalicion për partinë e tretë e që u refuzuan, e dyta është përpjekja për formimin e komisioneve parlamentare, dhe kjo e treta që gjendemi tani: mandatari i dytë”, tha kandidati për kryeministër.
Konjufca përmendi edhe synimet që kanë për vitin e ardhshëm.
“2026 do jetë vit i investimeve kapitale e shëndetësisë, rritjes së pagës minimale, reformës së sistemit pensional, reformë për fondet e sigurimeve shëndetësore, transparencës e rendit publik.
Vit i mbështetjes për vajza dhe gra dhe të rinjeve në teknologji të informacionit”, tha ndër të tjera Konjufca.
Gjatë paraqitjes së tij ai prezantoi edhe përbërjen e qeverisë së propozuar, në përbërje:
Zv. kryeministër i parë dhe ministër i Punëve të Jashtme – Albin Kurti
Zv. kryeministre e dytë dhe ministre e Drejtësisë – Donika Gërvalla
Zv. kryeministër i tretë për çështje të pakicave dhe bashkëpunim ekonomik – Fikrim Damka
Ministër i Financave dhe Ekonomisë – Hekuran Murati
Ministër për Familje dhe Mirëqenie Sociale – Andin Hoti
Ministër i Mbrojtjes – Ejup Maqedonci
Ministër i Punëve të Brendshme – Xhelal Sveçla
Ministër i Administratës Publik dhe Digjitalizimit – Lulzon Jagxhiu
Ministër i Shëndetësisë – Arben Vitia
Ministër i Arsimit – Avni Zogiani
Ministër i Kulturës dhe Turizmit – Fatmir Spahiu
Ministër i Sportit dhe Rinisë – Blerim Gashani
Ministër i Administrimit të Pushtetit Lokal – Rasim Demiri
Ministre e Mjedisit dhe Planifikimit Hapësinor – Fitore Pacolli
Ministër i Bujqësisë, Pylltarisë dhe Zhvillimit Rural – Armend Muja
Ministër i Infrastrukturës dhe Transportit – Besnik Bislimi
Ministre e Tregtisë, Industrisë dhe Integrimeve Evropiane – Mimoza Kusari-Lila
Ministre e Energjisë dhe Minierave – Artane Rizvanolli
Ministër për Komunitete dhe Kthim – Nenad Rashiq
Ministër për Zhvillim Rajonal – Sejnur Vejshall.
Pas paraqitjes së mandatarit për kryeministër, fjalën e morën përfaqësuesit e grupeve parlamentare.
Në emër të Partisë Demokratike të Kosovës deputeti Uran Ismaili tha se kjo seancë është e pakuptimtë dhe farsë.
“Seanca është e pakuptimtë sepse rezultati i seancës dihet. As vet kandidati Konjufca nuk beson se ai do të jetë kryeministër i vërtetë e Kurti zëvendës i tij”, tha Ismaili, duke theksuar se vota e PDK-së do të jetë kundër.
Në emër të Lidhjes Demokratike të Kosovës, deputeti Lumir Abdixhiku tha se kryeministri Kurti në vend se të merret me probleme të qyetarëve, merret me gjëra joreale.
“Temat që i prekin qytetarët tanë, nuk janë as qëllim apo prioritet i tij”, tha Abdixhiku.
Në emër të Aleancës për Ardhmërinë e Kosovës, deputeti Ramush Haradinaj, theksoi mungesë serioziteti për peshën e situatës në vend nga ana e mandatarit për formimin e Qeverisë.
“Jo për shkak të formës, po për shkak të respektit të peshës së proceseve, kritikën për mandatarin e kam se nuk na dha një listë me emrat e kabinetit qeveritar. Ka qenë e rrugës me na i dhanë këta emra”, tha Haradinaj.
Qëndrimet e tyre i paraqitën edhe Lista Serbe dhe Grupi parlamentar multietnik, nëpërmjet deputetëve Igor Simiq dhe Elbert Krasniqi. Simiq u deklarua kundër qeverisë së propozuar, ndërsa Krasniqi konfirmoi mbështetjen e grupit që përfaqëson.
Pas diskutimeve kryetari Basha procedoi me votimin e kabinetit të propozuar.
Nga deputetët e pranishëm, 56 deputetë votuan “për”, 53 “kundër”, ndërsa 4 deputetë abstenuan. Në bazë të rezultatit kryetari Basha tha se Qeveria e re nuk është zgjedhur pasi që nuk mori 61 votat e domosdoshme.
