Rrokulliset vetura zyrtare në rrugën Gjilan-Prishtinë
Vetura 4Z që u rrokullis mëngjesin e së mërkurës në rrugën Gjilan-Prishtinë është pronë e Prokurorisë së Shtetit. Kjo veturë shfrytëzohet nga zyra regjionale e Mbrojtësve të Viktimave në Ferizaj.
Në veturën zyrtare ishin tre anëtarët e komisionit për tjetërsim të pasurisë, bëhet fjalë për:
“I.T., – Mbikëqyrës i zyrës regjionale në Ferizaj – Kryesus i komisionit, D.H., – Mbrojtës i Viktimave nga regjioni i Gjilanit -anëtar i komisionit dhe F.S., – Zyrtar i Transportit III zyra regjionale në Ferizaj – anëtar i komisionit”.
Këto informacione i ka konfirmuar për Gazetën Express Demë Hasanaj, u.d. Menaxher i Zyrës për Mbrojtje dhe Ndihmë Viktimave në Zyrën e Kryeprokurorit të Shtetit.
“Ju njoftoj se dje me datën 16.11.2022 rreth orës 09:11 në rrugën Gjilan -Prishtinë më saktësisht tek liqeni i Badovcit është vetaksidentuar vetura 4Z-151-03, pronë e Prokurorisë së Shtetit, e cila shfrytëzohet nga zyra regjionale e Mbrojtësve të Viktimave në Ferizaj. Në veturën 4Z-151-03 ishin tre anëtarët e komisionit për tjetërsim të pasurisë të cilët ishin nisur për të përfunduar punën e komisionit në depon e Zyrës për Mbrojtje dhe Ndihmë Viktimave në Smrekovnicë. Ata janë: I.T., – Mbikëqyrës i zyrës regjionale në Ferizaj – Kryesus i komisionit, D.H., – Mbrojtës i Viktimave nga regjioni i Gjilanit -anëtar i komisionit dhe F.S., – Zyrtar i Transportit III zyra regjionale në Ferizaj – anëtar i komisionit”, tha Hasanaj për Gazetën Express.
I njëjti konfirmoi se të lënduarit pas trajtimit mjekësor në QKUK janë liruar për në shtëpi.
“Vlenë të ceket fakti se të tre zyrtarëve ju është ofruar ndihma mjekësore dhe pas trajtimit në QKUK, të tre zyrtarët janë liruar për në shtëpi”, tha ai.
Hasanaj shtoi se janë në pritje të raportit policor në lidhje me këtë vetaksident.
Zëdhënësja e policisë për rajonin e Prishtinës, Florie Ahmeti tha për Gazetën Express se policia ka nisur një hetim për zbardhjen e shkaqeve të vetaksidentit që ndodhi dje rreth orës 09:00.
“Rreth orës 09:00, në rrugën Prishtinë -Gjilan, ka ndodhur një aksident trafiku, ku është përfshirë një automjet. Bazuar në të dhënat e deritanishme, si pasojë e aksidentit tre persona kanë pësuar lëndime trupore dhe të njëjtit janë dërguar për trajtimin e nevojshëm mjekësor. Policia ka nisur një hetim për zbardhjen e shkaqeve të këtij vetaksidenti”, tha Ahmeti të mërkurën për Gazetën Express.
