Rrezik për bletët në Gjilan e Kamenicë – sëmundja “Pesma Amerikane” godet prodhimin
Bletarët në komunat e Gjilanit dhe Kamenicës po përballen me sfida serioze që po ndikojnë në shëndetin dhe produktivitetin e bletëve të tyre.
Një qytetar nga Gjilani, i cili dëshiroi të mbetet anonim, ka treguar se sëmundja e quajtur “Pesma Amerikane” ka shkaktuar dëmtime serioze te bletët.
“Importi i bletëve nga vendet e rajonit ka sjellë me vete një sëmundje të njohur si ‘pesma amerikane’, e cila nuk mund të trajtohet në asnjë mënyrë”, tha qytetari.
Sipas tij, nuk ka ndonjë masë mbrojtëse efektive ndaj kësaj sëmundjeje.
“Është një virus që nuk ka trajtim, prandaj nuk mund të ndërmerren masa për parandalim apo kurim”, shtoi ai, duke theksuar se si pasojë ka rënë dukshëm rendimenti i bletëve.
Ndërkohë, nga Drejtoria për Bujqësi në Gjilan kanë deklaruar për Telegrafin se aktualisht nuk ka asnjë projekt për dezinfektimin e bletëve, dhe se komuna nuk posedon buxhet për mbështetjen e bletarëve.
Ndërsa, Granit Sylejmani nga Shoqata e Bletarëve në Gjilan ka bërë thirrje tek të gjithë bletarët që në rast se bletët e tyre kanë këtë llojë sëmundje, të adresohen tek AVUK në mënyrë që të asgjësohen sandekët e bletëve.
Sipas tij, kjo sëmundje është bartëse dhe nëse nuk alarmohet, mund të rrezikoj të gjithë koloninë e bletëve.
Përkundër kësaj, në dhjetor të vitit 2024, në Gjilan u organizua një trajnim për bletarët e Anamoravës, ku u trajtuan tema të rëndësishme si: sëmundjet e bletëve, të ushqyerit dhe trajtimi kundër varrotozës.
Ky trajnim kishte për qëllim përmirësimin e praktikave të mbarështimit dhe ndihmën për përballimin e sfidave që po përjetojnë bletarët. /Telegrafi/
