Rikthehet në jetë pacienti i sjellë pa shenja jete në Emergjencën e Spitalit të Përgjithshëm në Gjilan
Me datën 17 shtator 2023 në ora 14:00h është sjellur një pacient pa shenja jete në Spitalin e përgjithshëm në Gjilan. Ekipi i udhëhequr nga shefi i emergjencës Dr. Begush Canaj arritën ta rikthejnë në jetë pacientin!
Pacienti sillet në gjendje të rëndë pa shenja jete, në arrest kardiorespirator. Pas marrjes së menjëhershme të masave të reanimimit kardiopulmonar, të cilat kanë zgjatur afër 15 minuta, pacienti rikthehet në jetë me parametra vital stabil, me frymëmarrje normale dhe me vetëdije.
“Pacienti pas stabilizimit hemodinamik, në mënyrë të sigurtë me autoambulancë, nën përkujdesjen e mjekut Dr. Begush Canaj dhe infermieres Valbona Gashi, është përcjellur për Prishtinë në QKUK, në repartin e Kardiolgjisë ku i është nënshtruar procedurës së kardioangiografisë dhe është stentuar”, thuhet në njoftimin e Spitalit të Përgjithshëm në Gjilan.
“Ky nuk është rast i vetëm që falë angazhimit dhe punës profesionale të stafit të Emergjencës pacientet rikthehen në jetë në mënyrë të sukseshme”, është shtuar më tej.
Stafi i Emergjencës në Spitalin e Përgjithshëm në Gjilan është vërtet i përkushtuar që në mënyrë të sigurtë dhe të shpejt të japi shërbime shëndetësore për të gjithë qytetarët që kërkojnë ndihmë, e sidomos ata në gjendje të rënduar të sëmundjes apo lëndimeve traumatike.
Shef i Emergjencës Dr.Begush Canaj
Motër kryesore Sevdie Haziri Musliu
