Rektori i UKZ-së priti në takim ekipin e ORCA-s
Rektori i Universitetit Publik “Kadri Zeka” në Gjilan Prof. Asoc. Dr. Artan Dërmaku me bashkëpunëtorë, ka pritur në një takim ekipin e Organizatës për Rritjen e Cilësisë në Arsim (ORCA) udhëhequr nga Drejtori i kësaj organizate, Rron Gjinovci.
Me këtë rast drejtori Rron Gjinovci e ka përgëzuar Porf. Asoc. Dr. Artan Dërmaku për marrjen e detyrës Rektori i UKZ-së.
Nga ana e tij Rektori Dërmaku e ka falënderuar ekipin e ORCA-së për vizitën, derisa i ka njoftuar ata për punën, profilizimin e universitetit, ngritjen e cilësisë së mësimdhënies, zhvillimet dhe aktivitetet tjera në Universitet.
Rektori Prof. Asoc. Dr. Artan Dërmaku, tregoi gatishmëri për bashkëpunim me ORCA-n, me qëllim të avancimit të cilësisë në Universitet, derisa theksoi se në proces të ngritjes së cilësisë janë duke u bërë disa ndryshime si, digjitalizimi i proceseve administrative dhe akademike, shtimi dhe profilizimi i programeve të studimeve, përmirësimi i infrastrukturës në përgjithësi, e të cilat janë nismat fillestare në dobi të çuarjes përpara të proceseve të zhvillimit të Universitetit.
Po ashtu ekipi i ORCA-s së bashku me menaxhmenti e UKZ-së, vizituan bibliotekën e universitetit, laboratorët, amfiteatrot, sallat e mësimit, për të parë nga afër infrastrukturën e zhvillimit të procesit mësimor.
Kësaj ngjarje i ka kushtuar vëmednje e rëndësi të posaçme edhe Organizata për Rritjen e Cilësisë në Arsim – ORCA, e cila e ka postuar në faqen e saj lajmin.
“ORCA viziton për herë të parë Universitetin e Gjilanit për ta përgëzuar rektorin e ri profesor Artan Dermaku për fillimin e mandatit si rektor. ORCA shprehu gëzimin dhe entuziazmin e saj për arritjen në krye të një institucioni publik të arsimit të lartë të një profesori si Artan Dermaku, i cili ka arritje të rëndësishme akademike në fushën në të cilën angazhohet”, thuhet në njoftimin e postuar në faqen e kësaj organizate.
“ORCA ofroi mbështetjen e saj përmes projekteve që ka, me qëllim përshpejtimin e hapave në reformimin sa më të shpejtë të Universitetit të Gjilanit. Po ashtu theksoi nevojën e mirëkuptimit nga ana e menaxhmentit të ri për kritikat eventuale në të ardhmen, të cilat qëllim të vetëm e kanë përmirësimin e cilësisë në arsimin e lartë publik”, thuhet në fund të njoftimit.
