Rektori i UKZ-së priti në takim autorët e librit të parë mbi sistemin tatimor dhe përdorimin e softuerëve në Kosovë
Rektori i Universitetit Publik “Kadri Zeka”, Prof. Asoc. Dr. Artan Dermaku, ka pritur në takim autorët e librit të ri “Sistemi tatimor në Kosovë dhe aplikimi përmes softuerëve – nga teoria në praktikë”, Prof. Asoc. Dr. Shefket Jakupi dhe Prof. Asoc. Dr. Nexhat Shkodra, profesor në Fakultetin Ekonomik në UKZ..
Ky libër është i pari në Kosovë që trajton në mënyrë të detajuar sistemin tatimor dhe përdorimin praktik të softuerëve për administrimin fiskal. Ai kombinon analizën teorike me praktikat profesionale në kontabilitet dhe deklarimin elektronik, duke përfshirë aspektet ekonomike, ligjore dhe procedurale të sistemit tatimor në vend.
Përveç pjesës ligjore, libri shqyrton edhe ndikimin e sistemit tatimor në zhvillimin ekonomik të Kosovës. Me shembuj praktikë dhe ushtrime të dedikuara, ai synon të përgatisë studentët dhe profesionistët për përdorimin efektiv të softuerëve tatimorë, duke kontribuar në përmirësimin e efikasitetit të administrimit fiskal dhe rritjen e ndikimit pozitiv në ekonomi.
Prof. Asoc. Dr. Artan Dermaku, Rektori i Universitetit Publik “Kadri Zeka”, tha se ky libër përbën një kontribut të rëndësishëm për edukimin dhe përgatitjen profesionale të studentëve dhe ekspertëve në fushën e tatimeve dhe administrimit fiskal. Me kombinimin e teorisë dhe praktikës, ky libër ofron njohuri të thella mbi sistemin tatimor të Kosovës dhe përdorimin efektiv të softuerëve, duke i ndihmuar studentët dhe profesionistët të përballen me sfidat reale të ekonomisë dhe administrimit fiskal.
Rektori tha se Universiteti Publik “Kadri Zeka” mbështet dhe vlerëson iniciativat që fuqizojnë edukimin dhe zhvillimin profesional të brezit të ri, duke nxjerrë në pah përmbajtjen e librit për zhvillimin profesional të studentëve dhe ekspertëve në fushën tatimore.
