Reagon Leonora Morina-Bunjaku lidhur me largimin nga strukturat e PDK-së

Pas largimit të saj ditë më parë nga strukturat e PDK-së, ka reaguar Leonora Morina – Bunjaku, ish candidate e PDK-së për kryetare të Gjilanit në zgjedhjet e fundit locale, aktualisht nënkryetare e Komunës së Gjilanit.

“Mos përkrahja e tri vendimeve të jashtëligjshme, arsyeja kryesore e largimit tonë si anëtarët më të votuar të PDK-së!”, ka thënë veç tjerash ajo.

Reagimi i plotë nga Leonora Morina-Bunjaku

Të dashur qytetarë të komunës së Gjilanit dhe më gjerë.

Të nderuara media:

Mos përkrahja e tri vendimeve të jashtëligjshme, arsyeja kryesore e largimit tonë si anëtarët më të votuar të PDK-së!

Ndiejmë obligim moral si nënkryetare e komunës bashkë me dy drejtorët e drejtorive komunale, z. Bajram Isufi dhe z. Enver Shabani, gjegjësisht dy ish nënkryetarët dhe ish-sekretari i përgjithshëm i PDK-së dega në Gjilan, t’iu njoftojmë lidhur me largimin tonë nga funksionet dhe antarësia e PDK-së.

Arsyeja është për tri vendime të jashtëligjshme që nuk u votuan nga 4 asambleistë të PDK-së për shfuqizim, me ç’rast tri seanca radhazi u anuluan duke kërkuar nga pesë minuta pauzë, për të mos u kthyer në vazhdimin e seancave, dhe me atë rast erdhi deri te shkëputja e koalicionit nga ana e kryetarit të komunës z. Alban Hyseni, i cili në ndërkohë kërkoi nga ne të tre që të vazhdojmë për shkak të punës, bashkëpunimit dhe profesionalizmit tonë.

Ne, pas disa ditë pritje rreth marrjes së njohurive lidhur me çështjen kuptuam tri lloje skenarësh, dhe ne në ndërkohë kuptuam se ato bisedime lidhur me tri vendimet e jashtëligjshme ishin biseduar me individë të caktuar, e për ne të tjerët duhej vetëm t’i zbatonim urdhërat!

Me këtë rast dua të iu njoftojmë se në një shtet demokratik duhet të respektohet mendimi ndryshe, e në veçanti kur bëhet fjalë për shkeljen e ligjit, sepse askush nuk është mbi ligjin e në veçanti nëse ne si ligjvënës e ligjbërës, bëjmë shkeljen e tij atëherë çfarë të presim nga qytetarët dhe si të kërkojmë drejtësi, dinjitet e prosperitet?…

Ne e falënderojmë kryetarin e komunës për ofrimin e mundësisë së vazhdimit të bashkëpunimit në të mirë të qytetarëve dhe zhvillimit të vendit.

Ndjejmë keqardhje për një vendim të marrë nga PDK, duke e pasur parasysh se këta dy zotërinjtë ishin ndër aktivistët prej ditëve të para, donatorët, kontributdhënës dhe asambleistë, përderisa unë për 10 vite me radhë kontribuova në parti me të gjithë potencialin tim politik, profesional dhe moral, gjithmonë duke u bazuar në parime e vlera, duke garuar për asamble, dy herë për deputete dhe se fundi edhe për të parën e komunës, pikërisht atëherë kur dega ishte në gjendjen më të mjerushme që kishte qenë ndonjeherë…

Dhe krejt në fund, përjashtohemi sepse mbrojmë ligjin për atë që edhe na votuan qytetarët!

Andaj qytetarë të nderuar, ju falenderojmë për përkrahjen tuaj duke shprehur gatishmërinë dhe vullnetin që të jemi në shërbim të interesave të përgjithshme dhe asnjëherë ato individuale!