Reagimet pas përfshirjes së SHBA-ve në konfliktin Izrael – Iran
SHBA-të kanë kryer një sulm ndaj tre objekteve bërthamore në Iran. Presidenti amerikan tha se ky është një moment historik për SHBA-të, Izraelin dhe botën. Ministri i Jashtëm Iranian ka thënë se Irani duhet të përgjigjet, teksa sulmet me raketa kanë vazhduar në të dyja anët. KALLXO.com iu sjell zhvillimet nga Lindja e Mesme.
17:20- Parlamenti iranian voton për mbylljen e Ngushticës së Hormuzit
Parlamenti iranian ka përkrahur me votim propozimin për mbylljen e Ngushticës së Hormuzit, një nga pikat më kritike të transitit të naftës në botë, sipas raportimeve të medias, shkruan revista amerikane, “Newsweek”.
Megjithatë, çdo vendim përfundimtar për hakmarrje mbetet në dorë të Këshillit Suprem të Sigurisë Kombëtare të vendit dhe udhëheqësit Ajatollah Ali Khamenei. Vota në parlament thjesht e këshillon për mundësinë e marrjes së vendimin.
“Parlamenti ka arritur në konkludimin se Ngushtica e Hormuzit duhet të mbyllet, por vendimi përfundimtar i takon Këshillit Suprem të Sigurisë Kombëtare”, ka njoftuar të dielën komandanti i Gardës Revolucionare, Ismail Kowsari, anëtar i Komisionit të Sigurisë Kombëtare të Parlamentit, shkruajnë “Al Arabiya” dhe “Jerusalem Post”.
Votimi u zhvillua të dielën pas operacionit amerikan, “Çekani i mesnatës”, në të cilin shtatë bombardues të fshehtë B2 fluturuan drejt Iranit dhe hodhën 14 bomba “Massive Ordinance Penetrator” (MOP) në dy nga centralet bërthamore të Iranit, përfshirë centralin Fordou. Një central i tretë u godit me raketa lundrimi “Tomahawk”, të hedhura nga nëndetëset.
“Qëllimet amerikane nuk përfshijnë luftën ose ndërrimin e regjimit”
Zyrtarët më të lartë të Shteteve të Bashkuara të Amerikës kanë dhënë intervista dhe kanë mbajtur konferenca të shkurtra për media të dielën në Uashington, ku kanë spikatur se Shtetet e Bashkuara të Amerikës nuk kërkojnë të përfshihen në një luftë të gjatë me Iranin e as që ta rrëzojnë qeverinë e atjeshme, raporton Reuters
