Rashiti: “Mbi 1 milionë euro të hyrat e tatimit në pronë, qytetarët e Gjilanit shembull!”
Drejtori i drejtorisë për Buxhet e Financa në Komunën e Gjilanit, Riad Rashiti, thekson rezultatet shënuara nga të hyrat komunale në tremujorin e parë të vitit 2023.
Ai ka vlerësuar se Komuna e Gjilanit ka pasur rezultatet inkurajuese në këtë rrafsh, duke shënuar rritje të ndjeshme prej mbi 37% krahasuar me periudhën e njejt të vitit paraprak.
“Të hyrat e tatimit në pronë – Për katër muaj, mbi 1 milion euro të hyra nga tatimi në pronë apo 37% rritje nga viti 2022 si dhe 60 % rritje në krahasim me vitin 2021”, ka shkrur Rashiti në faqen e tij në facebook.
Ai më tej ka vlerësuar të gjeturat e konstatuara statistikore të të hyrave komunale, duke vlerësuar shembullin e qytetarëve.
“Qytetarët e Gjilanit janë shembull i kryerjes së pagesës për faturat e tatimit në pronë, vetëm për periudhën katër mujore janar-prill 2023 kanë paguar 1,059,483.89 euro, ndërsa për periudhën e njejtë të vitit të kaluar ka pasur inkasim 773,913.31 euro, ose në krahasim me vitin 2021 ku inkasimi ka qenë 659,936.20 euro. Pra rritja është e konsiderueshme e të hyrave vetanake komunale nga tatimi në pronë”, ka vijuar ai.
E sigurisht që ky buxhet do të kthehet në investime të projekteve që duhet t’iu shërbejë të gjithë qytetarëve të Gjilanit pa përjashtim, ka shtuar drejtori për Buxhet dhe Financa në Gjilan, duke vijuar me konstatimin se “me punë, komunikim dhe shërbime të mira ndaj qytetarëve, rezultatet nuk do të mungojnë”.
