Ra pa ndjenja në derbi lokal, humbi vetëdijen! – vonë e kuptoi në spitalin e Gjilanit se ekipi fitoi ndeshjen – pritet rikthimi i talentit të madh
Hendbollisti Rinor Selmani ka pasur një karrierë të suksesshme në klubin KH Drita të Gjilanit.
Ai gjatë sezonit 2017/18 ishte golashënuesi i parë në Superligën e Kosovës me gjithsej 247 gola.
Gjatë atij sezonit, ai u ndal nga një lëndim të cilin e mori në derbin mes KH Drita – KH Zhegra.
Për këtë ngjarje, ai tregon tërë rrjedhën e saj, duke e përshkruajtur fill e për pe atë përvojë të pakëndshme e cila e la jashtë parketit një sezonë të tërë!
“Ishte ditë e shtunë. Në gjithë qytetin flitej e përflitej për derbin dhe rivalitetin që kishin këto dy klube nga Anamorava. Unë isha në kulmin e shkëlqimit të karrierës sime dhe doja të bëja më të mirën për klubin e qytetit tim. Koha e ndeshjes po afrohej dhe të gjithë lojtarët ishim në ç’veshtore. Trajneri, si gjithmonë, mundohej të na motivonte për ta fituar ndeshjen. Palestra u mbush plot me shikues që bënin tifo për të dy anët, secila tifozëri për klubin e zemrës. Pjesa e parë shkoi mirë, ishim në avantazh. Gjatë pjesës së dytë, në një aksion ku mundohesha të depërtoja në mbrojtjen e kundërshtarit, u pengova nga një lojtar dhe pashë veten duke rënë, por nuk mund të vendosja duartë në parket. Kështu rashë me tërë trupin, pa kontrollë dhe për një çast humba vetëdijen! Dëgjoja një zhurmë, ishte zhurma e ambulancës që më dërgonte në spital… . Atje mora lajmin se nuk do të kthehesha në palestër. Gjatë atij viti u dëshpërova shumë. Familjarët dhe stafi po mundoheshin të më ngushëllonin. Atë natë, lajmi i vetëm i mirë ishte se kishim fituar derbin!”
Përgatiti: Melos Selmani
