Provedev nderon Lazion, shkruan historinë, barazon në sekondat e fundit në start të Champions League ndaj Athletico Madrid
Italiani i shënon me kokë Atletikos, i katëri portier që realizon në Champions League
Ivan Provedel do të mbetet gjatë në historinë e Lazios. Portieri 29-vjeçar u shndërrua në heroin e skuadrës italiane, me këtë gol tepër të bukur në sfidën debutuese në UEFA Champions League.
Italiani fluturoi në zonë për të devijuar drejt portës krosimin e Luis Alberto, duke shmangur humbjen e Lazios përballë Atleticos së Madridit. I dalë në ndihmë të sulmit, Provedel befasoi të gjithë me golin e 1-1, për të dërguar në delir tifozët italian në ‘olimpico’ dhe shokuar skuadrën spanjolle.
Gol që kapi në befasi edhe faqen zyrtare të klubit Lacial në ‘Twitter’ që kërkoi ndjesë se nuk kishin përgatitur poster ku Provedel shënon, pasi nuk e morën parasysh. Pas sfidës, 29-vjeçari pranoi se ka studiuar sulmuesin Imobile për të lëvizur në zonë.
“Nuk e kuptova plotësisht atë që ndodhi. Futbolli është i shpejtë në të mirë dhe në të keq. Mund të bëj shaka dhe të them se jam duke studiuar Imobilen. Luis Alberto zakonisht kroson në shtyllën e dytë dhe mendova se ishte i vetmi pozicion për të goditur. Kështu që shkova dhe godita.”
Provedel bëhet portieri i katërt që shënon në Champions League. Por ky nuk është goli i parë që italiani shënon në karrierë, pasi ai e gjeti rrugën e rrjetës në barazimin 2-2 të Askolit kundër Juve Stabia në Shkurtin e vitit 2020. Një portier goleador, me teknikun Mauricio Sarri që tashmë ka një ‘as nën mëngë’ për të zgjidhur sfida kyçe të një sezoni të gjatë.
