Promovohet libri “Derbi Drita – Gjilani (1945–2025)” i autorit Enver Sadiku
Me këngën e mirënjohur “Rrjedhë në këngë e ligjërime”, të interpretuar nga këngëtarja Elona Sadiku, u hap ceremonia e promovimit të librit Derbi Drita – Gjilani (1945–2025), me autor Dr. Enver Sadiku.
Ky eveniment kulturor-sportiv u përshëndet në emër të Komuna e Gjilanit nga drejtori për Kulturë, Rini dhe Sport, Kushtrim Zeqiri, i cili e vlerësoi librin si një kontribut të rëndësishëm në dokumentimin e historisë sportive të qytetit.
Në emër të Federata e Futbollit e Kosovës, fjalë përshëndetëse mbajti Armand Misini, anëtar i Komitetit Ekzekutiv të FFK-së, duke theksuar rëndësinë e veprave të tilla për ruajtjen dhe promovimin e trashëgimisë sportive.
Nga SC Gjilani, me një fjalë përshëndetëse u paraqit Drilon Sylejmani, ndërsa në emër të KF Drita foli drejtori sportiv, Valon Zymberi.
Për librin nga aspekti shkencor foli dr. Fitim Rifati, redaktor shkencor i veprës, i cili e cilësoi librin si një arritje të rëndësishme dhe vlerë të shtuar, veçanërisht për nga dimensioni historik dhe profesional, duke ndërlidhur të kaluarën sportive me aktualitetin dhe perspektivën e sportit në Kosovë.
Ndërkaq, nga aspekti sportiv, për librin foli Fehmi Sylejmani, recensent i veprës, i cili theksoi se autori, nga perspektiva e shikuesit, ish-lojtarit dhe gazetarit, i ka trajtuar të gjitha derbit me kujdes të veçantë dhe objektivitet të plotë.
Në fund të promovimit, autori i librit, Dr. Enver Sadiku, falënderoi të gjithë ata që e kanë mbështetur në çfarëdo forme gjatë realizimit të veprës, si dhe të pranishmit për pjesëmarrjen e madhe dhe interesimin e treguar.
Promovimi u moderua nga prof. Tahir Arifi, i cili i dha aktivitetit rrjedhë të natyrshme dhe një organizim dinjitoz.
