Prof. Dr. Isak Shema nderohet me çmimin për “Vepër Jetësore” nga Sokol Haliti
Kryetari i komunës së Vitisë, Sokol Haliti, ka pritur sot në një takim Prof. Dr. Isak Shema me një delegacion nga Shoqata e Shkrimtarëve dhe e Krijueseve “Ramadan Musliu”-Viti.
Me këtë rast kryetari Haliti, e ka çmuar lartë veprën e Prof. Dr. Isak Shema dhe i ka ndarë atij çmimin për vepër jetësore. Ai gjithashtu ka folur për kontributin e tij të dhënë ndër vite, duke e cilësuar si të çmuar dhe të pazëvendësueshëm, në veçanti gjatë viteve e 80-të dhe 90-të deri me sot, pasi që përkundër moshës ai vazhdon me angazhimin e tij letrar e shkencor.
Profesor. Dr. Shema falënderoi kryetarin Haliti për këtë çmim dhe tha se ka përzgjedhur vendlindjen për të promovuar librat e tij, e ndër to edhe librat ”Arti letrar i Ismajl Kadaresë” dhe ”Vështrime Shkencore”.
Ndryshe, sot në Viti, është mbajtur edhe një tryezë shkencore për kontributin letrar dhe shkencor të Prof. Dr. Isak Shema, ku është bërë promovimi i dy librave të tij.
Kjo tryezë u organizua nga Shoqata e Shkrimtarëve dhe e Krijueseve “Ramadan Musliu” në Viti qaë ka korrespoduar në ditëlindjen e tij. Me këtë rast i pranishëm në këtë tryezë ishte edhe zv. kryetari i komunës së Vitisë, Hasan Aliu, i cili e çmoj lartë kontributin letrar dhe shkencor të profesorit në fjalë. Kurse hapja e tryezës shkencore në 83 vjetorit të Isak Shemës, e bëri Fadil Abazi kryetar i Shoqatës së Shkrimtarëve “Ramadan Musliu” në Viti, i cili ia ndau një mirënjohje nga kjo shoqatë.
