Prishtinë: Tentoi ta djeg shkollën me benzinë, arrestohet njëri nga të dyshuarit
Dje policia raportoi se dy persona kanë hedhur benzinë brenda një shkolle dhe kanë tentuar t’ia vënë zjarrin shkollës, shkruan gazeta online Reporteri.net.
Sot, Policia njofton se një i dyshuar është arrestuar dhe është dërguar në mbajtje me vendin të prokurorit.
Njoftimi i policisë:
Raport shtesë
ASGJËSIM APO DËMTIM I PASURISË / ZJARRVËNIE NË TENTATIVË
Prishtinë / 03.05.2024 – 18:05. Më 04.05.2024 pas hetimeve të zhvilluara është identifikuar dhe arrestuar një mashkull kosovar si i dyshuar lidhur me tentimin për vënien e zjarrit në një klasë të një shkolle. I dyshuar pas intervistimit me vendim të prokurorit është dërguar në mbajtje.
Rast ishte cilesuar i pazakontë, pasi dy persona të maskuar kishin tentuar ta djegin me benzinë një shkollë në Prishtinë.
Paraprakisht, nga Policia e Kosovës në raportin 24 orësh ishte bërë e ditur se organet e rendit kanë raportuar se dy persona të panjohur kanë hedhur benzinë dhe kanë tentuar t’ia vënë zjarrin shkollës.
Rasti thuhej se ka ndodhur të premten në ora 18:05 në rrugën “Josip Rela” në Prishtinë.
“Raportohet se dy persona të panjohur, të maskuar, duke thyer dritaren e objektit të shkollës kanë hedhur lëndë djegëse-benzinë dhe kanë tentuar t’ia vunë zjarrin, por pasi janë diktuar nga personeli i shkollës të dyshuarit janë larguar në drejtim të panjohur”, thuhet në raport.
