Prishtina ‘zgjohet’ me letrën e Uran Ismailit: Është koha për ndryshim
Fushata e Uran Ismailit është veçuar për qasjen e saj të afërt me qytetarët, dhe sot, në ditën e fundit para zgjedhjeve, ajo u përmbyll po ashtu siç kishte nisur – me një letër dërguar në çdo shtëpi të Prishtinës.
Në letrën e tij, Ismaili falenderon qytetarët për përkrahjen dhe energjinë gjatë gjithë fushatës, duke kujtuar takimet në çdo lagje e fshat të kryeqytetit. Ai thekson se pavarësisht përvojave të ndryshme të njerëzve, të gjithë ndajnë të njëjtin shqetësim për gjendjen në Prishtinë dhe të njëjtën dëshirë për ndryshim.
“Ndryshimi është në dorën tonë,” shkruan ai, duke theksuar se bashkëpunimi dhe puna e përditshme janë mënyra e vetme për ta bërë Prishtinën funksionale, të pastër dhe të sigurt për të gjithë.
Letra përmbyllet me thirrjen e tij për besim dhe pjesëmarrje më 12 tetor: “Është koha për Prishtinën. Është koha jonë.”
Letra e plotë:
Mirëmëngjesi,
Kur e filluam këtë fushatë, ju drejtova me një letër të sinqertë e cila fillonte me një pyetje: A është Prishtina një qytet që funksionon?
Në javët që lamë pas, e kam vizituar çdo lagje e çdo fshat të Prishtinës. Kam vizituar dyqanet e kafenetë e lagjeve tuaja, dhe jam ndalur në hyrjet e banesave ku jetoni. E kam shpërndarë gazetën tonë me copëzat e ndryshimit në çdo rrugë e në çdo lagje, dhe jam frymëzuar nga shkëndijat e shpresës së madhe të këtij qyteti.
Ajo çfarë kam kuptuar është se pyetja që jua drejtova javë më parë nuk e prek secilin prej nesh njësoj.
Një nënë e re që nuk ka trotuar ku ta shtyejë karrocën e fëmijës nuk e ndjen njësoj si një gjysh i cili nuk del kurrë nga banesa sepse jeton në katin e pestë pa ashensor.
Një vajzë që ecë në ankth rrugëve të pandriçuara të lagjes nuk e ndjen njësoj si një burrë i cili kalon orë të tëra larg familjes sepse është i bllokuar çdo ditë në trafik. Një mysafir që nuk e gjen asnjë rrugë të pambuluar nga mbeturinat nuk e ndjen njësoj si një fëmijë që nuk ka kënde lojërash apo park në lagje.
Megjithatë, edhe pse nuk e ndjejmë njësoj, për një gjë pajtohemi të gjithë: Kaosi që e ka kapluar qytetin tonë është bërë i padurueshëm.
Por, a do të thotë kjo se duhet ta kthejmë kokën anash e të dorëzohemi? Kurrsesi, dhe në asnjë mënyrë! Ndryshimi është në dorën tonë.
Ndryshimi që vjen me bashkëpunim përtej logove partiake, me punë të përditshme, dhe me përkushtimin e njerëzve që e duan këtë qytet.
Ndryshimi që vjen kur bashkohemi rreth Prishtinës funksionale me rrugë më të sigurta, me lagje më të pastra, dhe me projekte që do ta përmirësojnë jetën në çdo lagje e në çdo fshat.
Ndryshimi që buron prej shpresës që vezullon fort në sytë e njerëzve të këtij qyteti.
12 tetori është momenti kur secili prej nesh duhet t’i përgjigjemi kësaj shprese me votë, dhe të besojmë se puna dhe bashkëpunimi gjithmonë e mposhtin kaosin.
Vota juaj për mua është votë për ndryshimin, dhe për Prishtinën funksionale që i shërben secilit. Dua të zotohem edhe një herë me atë që e kam përsëritur shpesh gjatë kësaj fushate: nëse nuk i përmbush 90% të premtimeve me të cilat e kam fituar besimin tuaj, nuk do të kërkoj më kurrë votë nga ju. Dhe për fund, dua t’ju them se do të jetë nderi i jetës sime t’ju shërbej juve, dhe t’i shërbej Prishtinës.
Me dashuri,
Uran Ismaili
