Presidentja Osmani mirëpret aktgjykimin e Kushtetueses dhe i bën thirrje deputetëve të veprojnë
Presidenca e Republika e Kosovës ka reaguar pas vendimit të Gjykatës Kushtetuese, duke e cilësuar aktgjykimin si konfirmim të argumenteve juridike të dorëzuara nga Presidenca dhe duke saktësuar se Presidentja Vjosa Osmani nuk ka bërë asnjë shkelje kushtetuese.
Sipas komunikatës së Presidencës, Gjykata Kushtetuese thekson në paragrafët 153, 155 dhe 190 se afati 60-ditor duhet të konsumohet para afatit 30-ditor të paraparë në nenin 86.2 të Kushtetutës, dhe se ky afat është përfundimtar dhe detyrues. Aktgjykimi nënvizon se nuk është dekreti i Presidentes që çon vendin në zgjedhje, por dështimi i Kuvendit për të zgjedhur Presidentin e ri.
“Dekreti është thjesht formalizim i një situate ekzistuese dhe nuk është ai që çon vendin në zgjedhje; por është vetë dështimi i Kuvendit për zgjedhjen e Presidentit që e shkakton këtë proces,” theksohet në komunikatë.
Presidentja Osmani mirëpret afatin 34-ditor të dhënë deputetëve nga Gjykata Kushtetuese dhe u bën thirrje që ta kryejnë urgjentisht këtë detyrim kushtetues. Presidenca thekson se çdo deklaratë politike për shkelje kushtetuese tregon keqlexim të aktgjykimit dhe politizim të situatës tashmë të qartësuar.
“Ftojmë Kuvendin e Kosovës që qysh nesër ta caktojë datën e seancës së re për zgjedhjen e Presidentit të ri dhe ta kryejnë detyrimin për të cilin janë zgjedhur, duke i dhënë vendit stabilitet dhe siguri,” përfundon komunikata.
