Presidentja Osmani: “Kosova dhe SHBA-të do ta finalizojnë së shpejti Dialogun Strategjik”
Gjatë vizitës së saj në SHBA, presidentja Osmani ka marrë konfirmimin nga Zëvendëssekretari Richard Verma se së shpejti do finalizohet “Dialogu Strategjik” mes Kosovës dhe ShBA-së, shkruan TV Gjilani.
Lajmi është mirëpritur nga ana e presidentes Osmani, e cila ka njoftuar përmes faqes së saj në rrjete sociale, duke e cilësuar “Lajm i shkëlqyeshëm për Republikën e Kosovës!”.
“Pas propozimit që i kam dërguar Shteteve të Bashkuara të Amerikës, si Presidente e Republikës qysh në vitin 2021, pastaj rikonfirmuar në qershor të vitit 2022 nëpërmjet notës verbale si dhe në takimin me Sekretarin Blinken në korrik 2022, si dhe pas një pune të jashtëzakonshme të ekipeve tona përgjatë viteve të kaluara, sot në takim me Zëvendës Sekretarin amerikan Richard Verma m’u konfirmua se Kosova dhe SHBA-të do ta finalizojnë së shpejti Dialogun Strategjik”. ka shkruar Osmani.
Osmani e ka vlerësuar tejet të rëndësishëm për Kosovën këtë njoftim, ndërsa është shprehur mirënjohëse ndaj ShBA-së, duke shfaqur gatishmërinë e saj dhe institucioneve të Republikës së Kosovës për thellimin e mëtejmë të bashkëpunimt reciprok me Qeverinë e Shteteve të Bashkuara të Amerikës.
“Kjo është një e arritur e jashtëzakonshme që dëshmon se partneriteti i mirëfilltë, i bazuar në vlera dhe interesa të përbashkëta, gjithmonë sjell rezultate. Falënderoj Qeverinë e Shteteve të Bashkuara të Amerikës për këtë përkrahje ndaj popullit të Kosovës dhe mezi pres ta vazhdojmë bashkëpunimin intensiv në interes të Kosovës. Ekipet tona do të takohen së shpejti për ta finalizuar marrëveshjen për Dialogun Strategjik e cila do të përfshijë fusha shumë të rëndësishme në interes të qytetarëve të Kosovës”, ka përfunduar Osmani./TV Gjilani/
