Policia: Shtatë të arrestuar në aksionin e Policisë në Kaçanik, sekuestrohet edhe një armë zyrtare
Drejtori i përgjithshëm i Policisë së Kosovës, Gazmend Hoxha, ka bërë të ditur se në aksionin e sotëm në Kaçanik janë arrestuar shtatë persona si të dyshuar për vrasjen e rreshterit Muhamet Lika.
Sipas Hoxhës, aksioni është zhvilluar në nëntë lokacione të ndryshme në Kaçanik, si dhe në një fshat të Klinës.
Tutje Hoxha bëri të ditur se të dyshuarit janë duke u intervistuar nga Policia e Kosovës.
“Operacioni është zhvilluar me autorizim të Prokurorisë Themelore, ku gjatë këtij operacioni janë bastisur nëntë lokacione, shumica e tyre në Kaçanik dhe një në Klinë, në një fshat të Klinës. Gjatë operacionit policor janë arrestuar shtatë persona të dyshimtë, të cilët dyshohet që kanë marrë pjesë në planifikimin dhe ekzekutimin ose vrasjen e rreshterit tonë Muhamet Lika. Të gjithë personat e arrestuar janë në proces të intervistimit nga hetuesit tanë policorë me autorizim të prokurorit”, ka thënë Hoxha, raporton Zeri.info.
Ai ka bërë të ditur se në mesin e gjërave të sekuestruara në këtë aksion është edhe një armë zyrtare me 30 fishekë të kalibrit 9-milimetërsh.
“Gjatë operacionit janë sekuestruar dy vetura, telefona celularë, disa laptopë, një armë zyrtare me 30 fishekë të kalibrit 9-milimetërsh, maska, tyta armësh, kapela sportive, rroba, fishekë, dylbi, si dhe dëshmi të tjera që do të shërbejnë për dokumentimin e rastit të vrasjes së rëndë të rreshterit policor dhe në lidhje me këtë operacion kontrollet janë duke vazhduar akoma”, tregoi Hoxha.
