Policia kap disa persona me armë ilegale brenda një dite, kryen bastisje në shtëpitë e të dyshuarve
Posedimi i armëve ilegale është një dukuri shqetësuese në vendin tonë, pasi që Policia vazhdimisht has në persona të armatosur të cilët cenojnë sigurinë e qytetarëve dhe rrezikojnë jetën e tyre.
Përpos armëmbajtjes, kosovarët janë edhe meraklinj të gjuajtjeve me armë, ku si pasojë janë shënuar shpesh herë plagosje të qëllimshme dhe nga plumbat qorr, të cilat me raste kanë përfunduar edhe me fatalitet.
Mësohet se vetëm dje janë zbuluar tri raste kur persona të ndryshëm janë kapur me armë ilegale.
Një 32-vjeçar në Podujevë i cili ishte përfshirë në një rrahje është kapur me armë në brez. Si rrjedhojë, Policia në koordinim me Prokurorinë kanë kryer bastisje në shtëpinë e tij ku kanë gjetur dhe sekuestruar një armë zjarri me një karikator. I dyshuari është dërguar në mbajtje për 48 orë.
Bastisje u krye edhe në shtëpinë e një personi në fshatin Vermicë të Malishevës. Kjo erdhi pas informacioneve se 41-vjeçari posedon armë për të cilën nuk ka leje përkatëse. Gjatë kontrollit të shtëpisë, Policia ka gjetur një pushkë gjuetie me disa fishekë të cilat janë sekuestruar. I dyshuari është shoqëruar në stacion policor dhe ndaj tij kanë nisur hetimet nën dyshimet për kryerjen e veprës penale ‘Mbajtje në pronësi, kontroll ose posedim të paautorizuar të armës’ dhe ‘Përdorim i armës apo mjetit të rrezikshëm’.
Për armëmbajtje pa leje u denoncua edhe një 25-vjeçar në Prishtinë. I njëjti ka pranuar se posedon një armë zjarri me fishekë, e cila u sekuestrua pasi u gjet në banesën e të dyshuarit gjatë bastisjes nga Policia. Me urdhër të prokurorit, ndaj të dyshuarit i cili u intervistua në stacion policor, është iniciuar rasti ‘Mbajtje në pronësi, kontroll ose posedim të paautorizuar të armëve’.
Ndryshe, sipas Kodit Penal të Republikës së Kosovës kushdo që mban në pronësi, kontrollon ose posedon armë në kundërshtim me ligjin e zbatueshëm lidhur me armë të tilla, dënohet me gjobë deri në shtatëmijë e pesëqind (7.500) Euro ose me burgim deri në pesë (5) vjet.“
