Piloti e braktisi avionin, ushtria amerikane kërkon ndihmë për gjetjen e tij!
Ushtria Amerikane ka kërkuar ndihmën e publikut për të gjetur një prej avionëve të saj luftarakë, F-35B, me vlerë 100 milionë dollarë.
Avioni u zhduk të dielën pasdite, kur piloti e ‘braktisi’ teksa po fluturonte mbi Karolinën e Jugut. Sipas asaj që shkruan BBC, ai u hodh me parashutë nga avioni dhe ndodhet në spital, në gjendje të stabilizuar shëndetësore.
Zyrtarët amerikanë thanë se avioni ishte përfshirë në një incident, por pa dhënë detaje të tjera se për çfarë bëhej fjalë. Avioni u la në autopilot në momentin që piloti u hodh prej tij. Sipas zyrtarëve mjeti mund të ketë qëndruar në ajër për një kohë të gjatë.
Ata shtuan se po i fokusonin kërkimet rreth liqenit Moultrie dhe liqenit Marion, në veri të qytetit të Charleston. Zona e kërkimit u bazua në vendndodhjen e fundit të njohur të avionit.
