Përmbyllet kampanja dyjavore “Më prano. Më mbështet. Më përfshi”
Me aktivitete të shumta ka përfunduar kampanja dy javëshe “Më prano. Më mbështet. Më përfshi!”, e cila ka filluar nga 21 marsi, me rastin e Ditës Ndërkombëtare të Sindromës Down dhe Ditës Botërore të Autizmit me 2 prill.
Në aktivitete ishin fëmijët dhe të rinjtë me Sindromën Down dhe Autizëm, prindërit dhe kujdestarët, psikologët dhe profesionistët që po kontribuojnë dhe të gjithë ata që jenë pjesë e një komuniteti më të dashur dhe gjithëpërfshirës.
Kryetari i Komunës së Gjilanit, Alban Hyseni, tha se para dy javësh nisën një cikël aktivitetesh të vazhdueshme për të shënuar Ditën e Sindromës Down dhe sot, po në të njëjtin vend përmbyllëm këtë periudhë me një aktivitet të veçantë për Ditën Botërore të Autizmit.
Sipas tij këto aktivitete dyjavore ishin një mundësi për të bashkuar komunitetin, shkollat, familjet dhe institucionet, për të rritur ndërgjegjësimin dhe për të theksuar rëndësinë e përfshirjes dhe mbështetjes për fëmijët me nevoja të veçanta.
I pari i Gjilanit, thekson se e dinë që për të krijuar një shoqëri të barabartë, duhen investime dhe angazhim i vazhdueshëm.
“Angazhimi ynë nuk ndalet këtu. Do të vazhdojmë të krijojmë kushte më të mira dhe mundësi për çdo fëmijë që ka nevojë për mbështetje, duke e siguruar që të gjithë ata të kenë mundësi për të realizuar potencialin e tyre në një shoqëri që i pranon dhe i respekton. T’i pranojmë, t’i përkrahim, t’i përfshijmë”, tha kryetari Alban Hyseni.
Drejtori për Arsim në Komunën e Gjilanit, Shpend Nuhiu, tha se kjo kampanjë dyjavore, është një dëshmi e angazhimit tonë shoqëror dhe institucional për të krijuar një mjedis më të drejtë dhe gjithëpërfshirës.
Ai thekson se të gjithë bashkë, me përkushtim dhe dashuri, mund të ndërtojnë një shoqëri më të drejtë dhe më të barabartë për çdo fëmijë.
“Të jetë kjo një kujtesë që pranimi, mbështetja dhe përfshirja nuk janë vetëm fjalë, por vlera që duhet t’i zbatojmë çdo ditë”, tha drejtori i Arsimit Shpend Nuhiu.
Kjo kampanjë është organizuar nga Komuna e Gjilanit, përkatësisht Drejtoria e Arsimit në Kampusin Shkollave të Mesme në Gjilan, duke zhvilluar aktivitete sportive, rekreative dhe edukative.
Këto aktivitete nuk do të ishin të mundura pa bashkëpunimin e shkëlqyer dhe koordinimin e aktiviteteve nga psikologet e shkollave të mesme, të cilat kontribuan me përkushtim.
