Përfaqësues të UKZ-së morën pjesë në sesion informues për projektin DELTA
Përfaqësues të Universitetit Publik “Kadri Zeka” në Gjilan morën pjesë në një sesion informues të organizuar nga Kolegji Ndërkombëtar Universum, në kuadër të projektit DELTA – Avancimi i Aftësive për të Dhëna dhe Inovacionit në Ballkanin Perëndimor.
Ky aktivitet mblodhi së bashku partnerë, profesorë dhe përfaqësues të komunitetit të biznesit, për të diskutuar rëndësinë e aftësive për të dhëna (data literacy) dhe për të eksploruar mënyrat e forcimit të bashkëpunimit ndërinstitucional në fushat e arsimit, kërkimit dhe inovacionit në Kosovë.
Nga Universiteti Publik “Kadri Zeka”, morën pjesë, Prof. Asoc. Dr. Selim Daku, Dekan i Fakultetit të Shkencave Sociale, Petrit Canaj, Sekretar i Njësisë Akademike, si dhe profesorët Blerim Haziri dhe Berat Dermaku. Në aktivitet morën pjesë gjithashtu edhe përfaqësues nga sektori i biznesit, ndër ta Refik Ramadani (Led-Com.ch & UKZ), Asdren Toska (Toska Electronics), Vedat Morina (Telkos) dhe Amir Rama (Omi Kitchen).
Ky bashkëpunim nënvizon rëndësinë e partneriteteve ndërmjet akademisë dhe sektorit privat në ndërtimin e një baze të qëndrueshme për vendimmarrje të bazuar në të dhëna, si dhe në përgatitjen e brezave të rinj për ekonominë digjitale.
