Përballja e dy trajnerëve nga Shqipëria, Mezani e Daja, mbyllet pa gola! – Ballkani assesi të gjejë rrugën tek fitoret

Ballkani ka luajtur baras 0-0 në udhëtim ndaj Gjilanit, xhiro e vlefshme për javën e 13-të të elitës së futbollit kosovar.

Komisioni i Garave kishte vendosur më herët për shtyerjen e kësaj ndeshjeje, për shkak të angazhimeve të Ballkanit në garat ndërkombëtare.

Pjesa e parë ishte mjaft e zbehtë dhe nuk prodhoi ndonjë rast të mirë për gol, me ndeshjen që zhvillohej kryesisht me duele në mesfushë.

Rasti i vetëm diçka më serioz në 45 minutëshin e parë i takoi Ballkanit. Ishte Vesel Limaj i cili me një vollej goditje në minutën e 13-të testoi Betim Halimin e vendasve që reagoi mirë.

Në pjesën e dytë pati diçka më shumë sa i përket rasteve të shënimit, por të dy portat në fund mbetën të paprekura.

Melos Bajrami (64’) pati një mundësi të mirë brenda zonës por goditja e tij shkoi në rrjetën e jashtme të portës së Koliçit.

Ballkani në anën tjetër pati një mundësi me Mamadou Danfa (87’) por i njëjti nuk arriti që ta shtyej topin drejt rrjetës pasi u shërbye mjaft mirë në zonë

Ballkani tashmë ka katër ndeshje pa fitore në elitë dhe vazhdon si lider me 40 pikë të grumbulluara, por që tani distanca me Dritën është shkrirë në vetëm gjashtë pikë.

Gjilani në anën tjetër mori një pikë të vlefshme, në garën për të siguruar mbijetesën.

Mezani: Pikë që na gëzon

Pas barazimit 0:0 me Ballkanin, kryetrajneri i Gjilanit Gentjan Mezani ka deklaruar”

“Si kanë shkuar gjërat, ndoshta këtë barazim nuk do ta quaja dhuratë, ngase jemi në borxh të madh tek tifozët, që janë një tifozëri e mirë dhe jo ofenduese. Kjo pikë na gëzon sepse na ndihmon për të arritur objektivin e sivjemë. Një pikë morali, ngase luajtëm me një ekip që ka cilësi”,  tha Mezani.

Ai shtoi se tash i pret një punë më e madhe dhe se Gjilanit i duhet një merkato më e madhe dhe e menaxhuar mirë në pozicionet që i duhen ekipit.

Daja: Barazimi epilog real

“Besoj se rezultati baras ishte real dhe më i drejti. Mund ta zgjidhnim ndeshjen me një episod, por në fund rezultati është real. Kjo është java e 33-te dhe ne jemi të kënaqur me rezultatet, ngase edhe sivjet bëmë një paraqitje historike. Sot na mungoi gati gjysma e ekipit, por ne në fund po dalim para ekipeve pasuese me 6 pikë. Gjithçka bëmë mirë, ngase na mungoi një formacion i tërë”, tha Daja.

Ai vuri ne dukje se në dimër mund të ketë lëvizje te Ballkani, largime e prurje dhe se do t’a analizojnë me kujdes situatën dhe do të vendosin për situatën, ngase do të shihet merkato në dalje dhe ajo në hyrje dhe se do të angazhojnë vetëm elementë cilësorë.