Për gati tri javë, mbi 2 mijë vetura në veri i konvertuan targat në RKS
Që nga 1 nëntori, 2 mijë e 13 vetura me targa ilegale në veri të Kosovës janë konvertuar në RKS.
Kështu ka bërë të ditur për Gazetën Online Reporteri.net zëvendësdrejtori i Policisë në veri të Mitrovicës, Veton Elshani.
Ministria e Punëve të Brendshme tanimë ka njoftuar të gjitha personat që kanë automjete targa ilegale do të kenë mundësi të përfitojnë nga lehtësirat për regjistrim në targa RKS, deri më datë 1 dhjetor 2023.
Kjo përfshinë taksat doganore, taksën administrative në Qendrën e Regjistrimit të Automjeteve, tarifën për targa dhe tarifën për pajisje me certifikatë të regjistrimit të Automjetit.
Çështja e heqjes së targave, që Serbia lëshon për qytetet e Kosovës, ka shkaktuar një sërë krizash në dy vjetët e fundit, si dhe largimin e serbëve nga institucionet e Kosovës në veri në nëntor të vitit 2022.
