Pensionohet Sinan Sadiku – në pension të parakohshëm pas 26 vitesh punë

Më 31 tetor 2025, në ditën kur u përurua panorama poetike “Det ëndrrash”, Sinan Sadiku, Udhëheqës i Zyrës së Punësimit në Kamenicë, përmbylli karrierën e tij pas gati 26 vjetësh e 4 muaj në këtë detyrë.

Nga 1 nëntori 2025, ai do të jetë në pension të parakohshëm për shkak të problemeve shëndetësore. Gjatë kësaj kohe, ai ka udhëhequr me profesionalizëm dhe përkushtim, duke ndihmuar punëkërkuesit dhe punëdhënësit, si dhe duke bashkëpunuar ngushtë me institucionet lokale e qendrore.

Në fjalën e tij falënderuese, Sadiku shprehu mirënjohje për kolegët, bashkëpunëtorët dhe institucionet, me të cilat ka punuar ndër vite, duke u uruar suksese në detyrat e tyre 

Sinan Sadiku njihet si një nga krijuesit e shquar e të palodhur të Kamenicës e më gjërë, si dhe shembull adekuat i një zyrtari të respektuar të punësimit në Kamenicë.

Puna e tij e çmuar dhe bashkëpunimi e gatishmëria e tij për të quar e avancuar përpara institucionet e Kamenicës dhe kërkesat reale të qytetarëve, mbesin një nga punët më të mira që ka bërë Sinan Sadiku.

Postimi i plotë i shkruar nga Sinan Sadiku:

Pikërisht sot, më 31.10.2025, kur u përurua panorama poetike “Det ëndrrash” e hartuar nga unë, ishte dita e fundit e imja në detyrën e Udhëheqësit të Zyrës së Punësimit në Kamenicë. Prej 01.11.2025, për shkak të problemeve shëndetësore, do të jem pensionist i parakohshëm. Detyrën e Udhëheqësit të ZP-së në Kamenicë e kam kryer prej fillimit të korrikut të vitit 1999, ose gati 26 vjet e 4 muaj.

Në vitin 1999 kemi filluar prej zeros, sepse në objektin ku ka vepruar Enti i Punësimit dhe në objektin e komunës qe vendosur KFOR-i rus i cili nuk na pati lejuar ta merrnim asnjë dokument.

Falë angazhimit të përbashkët me personelin e ZP-së dhe bashkëpunimit me nivelin qendror e rajonal shpejt e patëm funksionalizuar institucionin.

Kemi qenë në shërbim të njerëzve që kanë kërkuar punë dhe të punëdhënësve që kanë kërkuar punëtorë. Me personelin e ZP-së në Kamenicë kemi punuar dhe bashkëpunuar me profesionalizëm, korrektësi e mirëkuptim të plotë dhe në mënyrën më të mirë të mundshme i kemi kryer detyrat tona, duke u dalë në ndihme të papunësuarve që kanë kërkuar punë dhe duke i realizuar Masat Aktive të Tregut të Punës (MATP) të dizajnuara nga niveli qendror në interes të punëkërkuesve dhe të punëdhënësve.