Pensionohet profesori Musa Ajeti pas një karriere të gjatë dhe të suksesshme akademike
Universiteti Publik “Kadri Zeka” në Gjilan ka shënuar pensionimin e Prof. Asoc. Dr. Musa Ajeti, profesor i Fakultetit Ekonomik, i cili për shumë vite me radhë ka dhënë një kontribut të çmuar në fushën e mësimdhënies, kërkimit shkencor dhe zhvillimit institucional të universitetit.
Me këtë rast, në Fakultetin Ekonomik u mbajt një aktivitet për nder të profesorit të pensionuar, ku fjalë rasti mbajti Dekani i Fakultetit Ekonomik, Prof. Dr. Xhevat Sopi. Ai vlerësoi lart punën profesionale, përkushtimin dhe etikën akademike të Prof. Asoc. Dr. Musa Ajeti, duke theksuar rolin e tij të rëndësishëm në formimin e gjeneratave të shumta të studentëve dhe në avancimin e cilësisë së mësimdhënies në fakultet.
Kolegët e Fakultetit Ekonomik dhe të universitetit e uruan Prof. Asoc. Dr. Musa Ajeti për pensionimin, duke shprehur mirënjohje dhe respekt për bashkëpunimin ndër vite, kontributin akademik dhe përkushtimin e tij profesional.
Prof. Asoc. Dr. Musa Ajeti, përveç angazhimit të tij si ligjërues, ka dhënë kontribut të rëndësishëm edhe në qeverisjen universitare, duke qenë anëtar i Këshillit Drejtues të Universitetit Publik “Kadri Zeka”. Në këtë rol, ai ka kontribuar në proceset vendimmarrëse dhe në zhvillimin strategjik të institucionit.
Në fjalën e tij, Prof. Asoc. Dr. Musa Ajeti shprehu mirënjohjen për bashkëpunimin dhe mbështetjen e vazhdueshme nga kolegët dhe studentët, duke theksuar se vitet e kaluara në Universitetin Publik “Kadri Zeka” do t’i mbajë gjithmonë si një përvojë të vlefshme profesionale dhe njerëzore.
Universiteti Publik “Kadri Zeka” në Gjilan shpreh falënderim dhe respekt të veçantë për kontributin shumëvjeçar të Prof. Asoc. Dr. Musa Ajeti dhe i uron shëndet, mirëqenie dhe suksese në etapën e re të jetës së tij.
