Pensionohet Mikereme Salihu – Kurteshi, zyrtare e kontributeve në ATK
Pas një pune me dekada të tëra në Administratën Tatimore të Kosovës, këtë fundjavë është pensionuar punëtorja e palodhshme Mikereme Salihu – Kurteshi për të cilën në ditën e pensionimit ka patur fjalë miradije nga kolegët, të cilët e kanë çmuar lartë punën dhe angazhimin e saj.
Asaj i është organizuar një përcjellje çfarë e ka merituar, duke qenë shembull i punës së palodhshme, i kolegjialitetit dhe afërsisë dhe mirësjeslljes.
Mikereme Salihu – Kurteshi, e lindur para 65-viteve në Roganë të Dardanës. Bashkë me familjen e saj vendosen në Gjilan në vitin 1962, ku ajo ka përfunduar shkollimin fillor dhe atë të mesëm e më pas ka përfunduar Fakultetin Ekonomik në Prishtinë në vitin 1986.
Një vit më pas, ajo ishte punësuar në Kombinatin e Duhanit në Gjilan dhe aty kishte punuar deri në fund të vitit 1988, kur ishte përjashtuar nga puna shkaku i diferencimit ideo-politik të asaj kohe dhe që nga ajo kohë e deri në vitin 2004 ishte e papunë, ndonëse kuadër me përgatitje superiore shkollore ajo për 17 vite me radhë ngeli pa vend të punës, por pa u dorëzuar asnjëherë.
Në vitin 2004, Mikreme Salihu – Kurteshi ishte punësuar në Administratën Tatimore të Kosovës si zyrtare e kontributeve, gjegjësisht në Trustin e Kursimeve Pensionale për komunat Gjilan, Kamenicë, Viti e Novobërdë e këtë detyrë e kreu deri në ditën e djeshme 18 tetor, kur edhe është pensionuar.
Ndryshe, kjo punëtore e dalluar është e martuar për Sabit Kurteshin, profesor në pension me të cilin kanë tre fëmijë, një vajzë e dy djem, të gjithë të martuar dhe që kanë krijuar familjet e tyre. Çifti bashkëshortor Sabit e Mikereme Kurteshi kanë katër nipa dhe një mbesë dhe tek ta përçojnë vullnetin për punë, atdhedashurinë dhe mirësinë.
Mikereme Salihu – Kurteshit kolektivi i ATK-së dhe të gjitha ata që e kanë njohur i dëshirojnë shëndet, jetë të gjatë dhe të lumtur, duke e vlerësuar lartë punën e saj, gjithnjë në shërbim të qytetarëve dhe të vendit të saj.
Burimi i lajmit: /kryelajmi.com/.
