Pensionohet gjyqtari Rasim Rasimi
Pas një pune 25-vjeçare në gjyqësor, është penzionuar gjyqtari i Supremes, Rasim Rasimi.
Rasimi është nderuar me mirënjohje për përkushtimin e tij në punë në sistemin gjyqësor e në veçanti për Gjykatën Supreme.
Kontributi i gjyqtarit Rasim Rasimi mbetet trashëgimi e rëndësishme e zhvillimit dhe forcimit të drejtësisë në vend.
Rasim Rasimi punoi në Gjykatën Supreme prej vitit 2018. Ai është Master i Shkencave Juridiko-Penale.
Provimin e Jurisprudencës e kreu në vitin 1990, pasi mbaroi praktikën profesionale në Gjykatën Themelore në Lubjanë – Republika e Sllovenisë, gjatë viteve 1988-1990.
Nga viti 1992 deri në vitin 2000, ishte sekretar shkolle në Drejtorinë e Arsimit të Kuvendit Komunal të Gjilanit.
Në vitin 2000, u emërua gjyqtar në Gjykatën Komunale të Gjilanit, funksion të cilin e ushtroi deri në vitin 2010.
Nga mesi i vitit 2010, deri në fund të vitit 2012, punoi si gjyqtar në Gjykatën e Qarkut në Gjilan.
Ndërsa nga 1 janari i vitit 2013 ishte gjyqtar në Gjykatën e Apelit të Kosovës, në Departamentin e Përgjithshëm – divizioni penal dhe në Departamentin për të Mitur.
Më 2 shkurt të vitit 2018 u dekretua gjyqtar i Gjykatës Supreme.
Ishte anëtar i Komisionit për Vlerësimin e Performancës së Gjyqtarëve në Këshillin Gjyqësor të Kosovës në vitin 2017, kryesues i Panelit për Lirim me Kusht në Këshillin Gjyqësor të Kosovës, viti 2018- 2022, trajnues në ish-Institutin Gjyqësor të Kosovës, përkatësisht në Akademinë e Drejtësisë, në programin për Arsimim të Vazhdueshëm për gjyqtarë dhe prokurorë, në fushën e lëmisë penale.
Ai është një ndër autorët e hartimit të Modulit për Drejtësinë për Fëmijë, e botuar në vitin 2012 nga Instituti Gjyqësor i Kosovës.
Ka marrë pjesë në grupin punues në draftimin e Kodit për të Mitur, të Kosovës.
Po ashtu, është pjesëmarrës në një numër të madh të konferencave, trajnimeve, seminareve dhe vizitave studimore me karakter ndërkombëtar, ku janë trajtuar tema të drejtësisë penale, drejtësisë për të mitur si dhe aspekte të tjera në mbrojtjen dhe avancimin e të drejtave dhe lirive themelore të njeriut.
